O Parlamento de Hungría aproba o ingreso de Suecia na OTAN

O Parlamento de Hungría ratificou este luns a entrada de Suecia na OTAN, co cal levantou o último obstáculo que afrontaba o país escandinavo para integrarse como membro de pleno dereito na Alianza Atlántica.

Hungría era o último país dos 31 membros da alianza en dar luz verde á integración de Suecia despois de que Turquía, outro país que tamén expuxo obxeccións á ampliación, o fixera a finais de xaneiro. A ratificación, transmitida en directo na páxina web do Parlamento, foi aprobada con 188 votos a favor e 6 en contra.

"A entrada de Suecia á OTAN fortalece a seguridade de Hungría, polo que pido que apoien a proposta", dixo o primeiro ministro magiar, o ultranacionalista Viktor Orbán, na apertura da sesión parlamentaria deste luns.

Para a súa entrada en vigor, a ratificación require aínda da firma do xefe do Estado, pero é unha formalidade. A luz verde húngara foi bloqueada durante máis dun ano e medio polo Goberno de Orbán, que aseguraba que se perdeu a confianza entre os dous países polas críticas "inxustas" de políticos suecos sobre a deriva democrática no país centroeuropeo.

A semana pasada, tras reunise en Budapest co seu homólogo sueco, Olf Kristersson, Orbán avanzou que o Parlamento ía tomar este luns as decisións necesarias para así "pechar unha etapa", xa que se está recuperando a confianza entre ambas as partes.

Tras a invasión rusa de Ucraína hai dous anos, Suecia e Finlandia decidiron abandonar a súa neutralidade e pediron entrar na OTAN. Hungría e Turquía ratificaron a entrada de Finlandia en marzo de 2023, pero mantiveron a Suecia á espera. O Parlamento turco deu a súa luz verde a finais do mes pasado.