O Poder Electoral, controlado polo chavismo, dá a vitoria a Maduro co 51 % dos votos, un resultado que a oposición non recoñece

O presidente de Venezuela Nicolás Maduro, no poder desde 2013, pediu este domingo "respecto á vontade popular" tras ser proclamado como mandatario reelecto, logo duns comicios en que competiu contra nove contendentes, entre eles o abandeirado da oposición maioritaria Edmundo González Urrutia.

"Iso é o que pinto como presidente, respecto á Constitucion, aos poderes públicos e á vida soberana de Venezuela, respecto á vontade popular (...) vou defender a nosa lei e o noso anhelo", remarcou o mandatario perante decenas de simpatizantes que se reuniron preto do palacio presidencial para escoitar o seu discurso de vitoria.

Prometeu que, con este triunfo, dará a súa vida enteira para levar adiante todos os cambios que necesita a patria, que viviu unha intensa crise económica entre 2014 e 2021, da que empezou a recuperarse levemente.

Maduro asegurou que traballará no seu terceiro mandato "para rescatar todos os dereitos vulnerados pola guerra económica", en alusión ás sancións económicas impostas por numerosos países nos últimos anos, especialmente polos Estados Unidos.

Considerou que a súa reelección "é o triunfo da paz, da estabilidade, do ideal republicano, das ideas de igualdade".

Segundo o primeiro boletín do Consello Nacional Electoral (CNE), Maduro foi reelixido o domingo co 51,2 % dos votos (5.150.092 apoios), mentres que González Urrutia obtivo o 44,2 % dos sufraxios (4.445.978 votos).

Este, segundo detallou o presidente do CNE Elvis Amoroso, construíuse co 80 % das actas electorais transmitidas desde os máis de 15.000 centros de votación e trátase dunha tendencia "contundente e irreversible". 

González Urrutia denuncia que "se violaron todas as normas" 

O candidato presidencial da principal coalición opositora de Venezuela Edmundo González Urrutia denunciou este luns que se violaron todas as normas, logo de que o CNE anunciase o triunfo de Maduro.

"Os venezolanos e o mundo enteiro saben o que ocorreu na xornada electoral de hoxe [polo domingo 28 de xullo], aquí violáronse todas as normas, ata o punto de que aínda non foron entregadas a maioría das actas", dixo o exembaixador, que se atopaba xunto á súa principal valedora, a líder antichavista María Corina Machado.

María Corina Machado di que o "novo presidente electo" é Edmundo González Urrutia e insta á Forza Armada a "facer respectar a soberanía nacional"

Machado dixo este luns que o "novo presidente electo" de Venezuela é González Urrutia, a pesar do anuncio do CNE da vitoria do candidato oficialista.

"Venezuela ten un novo presidente electo e é Edmundo González Urrutia. Gañamos e todo o mundo o sabe", declarou aos xornalistas a exdeputada, acompañada do abandeirado da Plataforma Unitaria Democrática (PUD), o principal bloque opositor.

"Esta é a verdade e é, meus queridos venezolanos, a elección presidencial coa maior marxe de vitoria na historia. Felicitacións, Edmundo!", expresou a líder antichavista, quen asegurou que a oposición maioritaria "derrotou" o oficialismo "en toda Venezuela".

A opositora asegurou que nos próximos días se anunciarán "as accións para defender a verdade" e "o respecto á soberanía popular" que este domingo "se expresou e elixiu" a González Urrutia, recalcou.

Machado instou á Forza Armada Nacional Bolivariana (FANB) a "facer respectar a soberanía popular" expresada nas presidenciais deste domingo, nas que asegura que gañou o candidato do maior bloque antichavista.

"Os cidadáns militares estiveron alí (...). O deber da Forza Armada Nacional é facer respectar a soberanía popular expresada no voto, e iso é o que esperamos nós os venezolanos de cada un dos nosos militares", dixo.

A xuízo da exdeputada, o anuncio do Consello Nacional Electoral (CNE), que dá a vitoria a Maduro co 51,2 % dos votos, "é imposible", xa que, segundo as máis do 40 % de actas que recibiron, González Urrutia obtivo o 70 %, mentres que o xefe de Estado, indicou Machado, o 30 %.

O candidato da oposición maioritaria expresara o domingo cedo a súa confianza en que a FANB "fará respectar" o resultado das eleccións.

Pola súa banda, o ministro de Defensa Vladimir Padrino López dixo que o país se prepara para comezar "unha nova etapa" logo dos comicios.

Para resgardar a seguridade do proceso, máis de 388.000 membros da FANB e dos distintos corpos de seguridade do Estado foron despregados no país, que mantén, ademais, un "peche" temporal "para o desprazamento fronteirizo de persoas, e tamén para o paso de vehículos", nos accesos terrestres coas nacións veciñas, Colombia e Brasil. 

Blinken cuestiona que os resultados anunciados en Venezuela reflictan a "vontade" do pobo

O secretario de Estado estadounidense Antony Blinken mostrouse este luns "seriamente preocupado" pola validez dos resultados anunciados pola comisión electoral de Venezuela, que dan por gañador a Nicolás Maduro, e cuestionou que reflictan a "vontade" dos votantes.

"Temos serias preocupacións de que os resultados anunciados non reflictan a vontade dos votos nin do pobo venezolano", dixo Blinken nunha comparecencia perante os medios en Tokyo xunto aos seus homólogos da alianza Quad, que ademais dos EUA, inclúe a Xapón, Australia e a India, pouco despois do anuncio electoral.

"É crítico que cada voto sexa xusto e transparente", dixo o xefe da diplomacia estadounidense, que pediu ás autoridades electorais venezolanas que "compartan inmediatamente a información coa oposición (...) e publiquen as táboas detalladas dos votos".

"A comunidade internacional obsérvaos moi detidamente e responderá en consecuencia", engadiu Blinken antes de continuar referíndose á axenda da reunión do Quad xunto aos seus colegas.

As eleccións presidenciais en Venezuela e a publicación dos seus resultados cadraron co secretario de Estado estadounidense, inmerso nunha xira por Asia para potenciar as alianzas do país norteamericano cos seus socios da rexión, marcada pola crecente influencia e actividades militares da China.

"Aplaudimos a xente venezolana pola súa participación nas eleccións presidenciais do 28 de xullo. Eloxiamos a súa coraxe e o seu compromiso coa democracia afrontando a represión e diversidade", sinalou Blinken antes de poñer en dúbida a validez dos resultados e pedir un maior escrutinio e transparencia ás autoridades electorais dese país.