O Rácing derrota o Amorebieta na Malata pero non culmina a remonta (2-0)

O Rácing despediu a temporada cunha vitoria tan merecida como inútil que non enturbou a festa que vive a cidade desde hai quince días que ascenderon. Malia o tres a cero en contra que traían os ferroláns do partido de ida, Cristóbal chamou apelou á épica para tentar a remonta. 

A chave, para o técnico, estaba en marcar un gol cedo e a esa tarefa se lanzaron os xogadores desde o asubío inicial. De feito, nos primeiros vintecinco minutos, realizaron nove remates. Algún deles preto da portería. E un de Padilla no minuto vinte e dous serviulle ao público da Malata para felicitarlle o aniversario ao seu número 22, o capitán Joselu.

Pero, sen dúbida, a ocasión máis clara da primeira metade foi un dobre remate de Carlos Vicente e Manzanara que non se transformou en gol por verdadeira mala sorte. O Amorebieta apenas inquedou nos primeiros corenta e cinco minutos salvo nun lanzamento de Iturraspe detido por Diego Rivas.

Na segunda metade, os racinguistas envorcáronse sobre a meta de Marino que respondeu con acerto. O gol semellaba cuestión de tempo. Héber caeu na área preto da media hora pero o colexiado non sinalou penalti. Despois de varios intentos, caeu o muro viscaíno. Un centro de Manu Justo desviao Murúa cara a súa propia portería. Quedaban trece minutos mailo engadido.

Sete máis tarde chegaba o segundo de Héber Pena logo dunha magnífica xogada individual. A remontada víase posible. Álex López tentouno, pero o seu disparo marchou fóra e con el rematou calquera esperanza de forzar a prórroga. O triunfo deu paso a unha festa completa na que festexaron o Amorebieta, como campión da Primeira Federación e o Rácing polo ascenso conseguido.