O Supremo mantén a inhabilitación de Junqueras ata 2031 malia a reforma da sedición

A Sala do Penal do Tribunal Supremo (TS) condenou o exvicepresidente catalán Oriol Junqueras por un delito de desobediencia en concurso con malversación, mantendo a pena de inhabilitación de 13 anos, o que supón que non poderá aspirar a ningún cargo público ata 2031, despois de revisar a sentenza do 'procés' ao amparo da reforma penal que eliminou a sedición e modificou a malversación.

Nun auto ditado leste mesmo luns, o tribunal condena a Junqueras e Raül Romeva, Jordi Turull e Dolors Bassa por desobediencia e malversación descartando unha rebaixa de penas ao manter este último delito na súa modalidade agravada, co que seguirán inhabilitados ata 2031, no caso do exvicepresident, e ata 2030, para os outros tres.  

Ademais, o tribunal condena a Jordi Sánchez e Jordi Cuixart por desordes públicas e a Carmen Forcadell, Josep Rull e Joaquín Forn por desobediencia. Con todo, nos seus casos este cambio de delitos supón a extinción total das súas respectivas condenas de inhabilitación.  

A Sala do Penal rexeita que a derrogación do delito de sedición poida entenderse agora castigado co novo delito de desordes públicas, indicando que a reforma penal deixa impunes os procesos secesionistas que non vaian acompañados de actos de violencia ou intimidación.

O exvicepresidente da Generalitat acusa o Alto Tribunal de "retorcer a lei" para seguir perseguindo o independentismo.

"O Supremo novamente retorce a interpretación do dereito e do espírito xeral da lei para continuar o seu exercicio represivo", di Junqueras.

O Supremo utilizou o mesmo criterio para os exconselleiros da Generalitat Dolors Bassa, Raül Romeva e Jordi Turull, que continúan inhabilitados para cargo público ata a próxima década.

Jordi Turull avanza que recorrerán a decisión: "Nós presentaremos todos os recursos que sexan posibles. Verémonos en Europa, que é onde se fai xustiza con maiúsculas e non hai vinganza, que é o que vemos na cúpula xudicial española".

O Tribunal Supremo considera que só se lle pode aplicar o novo delito de desordes públicas, o que substitúe a sedición, a Jordi Sánchez e a Jordi Cuixart. A ningún dos outros condenados polo procés. Polo que advirte que a reforma pactada entre o PSOE  e Esquerra Republicana deixa impunes futuros procesos secesionistas que non vaian acompañados de actos de violencia ou intimidación.

O PSOE considera que a sentenza lles dá a razón e que demostra que a corrupción segue estando penada coa súa reforma. O Partido Popular considera que a xustiza tirou por terra a pretensión do Goberno de, din, deixar impunes os líderes do procés.