O TAS reduce a sanción por dopaxe a Halep, que poderá competir de forma inmediata
O TAS reduce a sanción por dopaxe a Halep, que poderá competir de forma inmediata
O TAS concluíu que o consumo de Roxadustat non foi intencional por parte da tenista
Simona Halep poderá volver á competición de forma inmediata tras ver como o TAS reducía este martes de catro anos a nove meses a súa sanción por dopaxe, que ao aplicarse con carácter retroactivo expirou o pasado mes de xullo.
A romanesa recorrera ante o TAS contra a sentenza da Federación Internacional de Tenis do 22 de setembro de 2023 que a apartaba do deporte durante catro anos. Na súa sentenza deste martes, o tribunal de Lausanne ordena que a exclusión de nove meses se aplique ao período comprendido entre o 7 de outubro de 2022 e o 6 de xullo 2023.
Halep, gañadora de dous Grand Slam na súa carreira (Wimbledon e Roland Garros), foi investigada por consumo de Roxadustat, unha substancia prohibida, durante o US Open, en agosto de 2022.
O TAS concluíu que o consumo desa substancia, a través dun suplemento contaminado, non foi intencional por parte da tenista, aínda que si que recoñece "certo nivel de neglixencia" por parte desta, o cal xustifica o mantemento da sanción aínda que máis reducida.
A sentenza tamén ordena ao tribunal ético que regula o tenis, a ITIA, pagar unha indemnización a Halep de 20.000 francos suízos (20.800 euros) polos custos legais do contencioso.
