O Tribunal Supremo mantén a Álvaro García Ortiz como fiscal xeral do Estado

O Tribunal Supremo acordou, por unanimidade, manter a Álvaro García Ortiz á fronte da Fiscalía Xeral do Estado, ao desestimar o recurso dunha asociación de fiscais, a APIF, que pedía anular o seu nomeamento.

A Sección Cuarta da Sala do contencioso administrativo avanzou o ditame da sentenza que rexeita o recurso da Asociación Profesional e Independente de Fiscais (APIF). O contido da resolución coñecerase proximamente, informan fontes xurídicas, que engaden que os maxistrados levaban semanas traballando nesta sentenza dada a transcendencia do asunto.

Esta decisión prodúcese a véspera de que o xuíz do Tribunal Supremo Ángel Hurtado lle tome declaración como imputado pola presunta revelación de segredos na causa por fraude fiscal contra Alberto González Amador, noivo de Isabel Díaz Ayuso.

A Apif, que se presenta ademais como acusación popular contra o fiscal xeral na causa do noivo de Ayuso, interpuxo hai un ano un recurso contra a segunda designación de García Ortiz como fiscal xeral, de decembro de 2023, ao considerar que a súa actuación e a súa "parcialidade" en favor do Goberno durante a súa primeira etapa mostraban que o seu nomeamento "non se axusta á lei".

Apif apoiaba o seu recurso na sentenza do Supremo na que apreciou "desviación de poder" na actuación de García Ortiz cando anulou o nomeamento de Dolores Delgado como fiscal togada do alto tribunal, o que ao seu xuízo facía decaer o requisito de xurista de recoñecido prestixio, necesario para o cargo. Pouco despois, García Ortiz recusou sen éxito aos maxistrados por falta de imparcialidade, xa que son os mesmos que resolveron o caso de Delgado, nun movemento que non sentou nada ben no tribunal.

A defensa de García Ortiz, no seu escrito de conclusións, sinalaba que esa asociación de fiscais imputa ao fiscal xeral "actuacións que non realizou nunca" e apuntaba que o fai con "argumentos que son pura propaganda" para, entre outras cousas, "socavar ao Goberno que efectúa o nomeamento de modo indirecto".

"Dá igual que haxa ou non base para impugnar un nomeamento do Goberno, o que se pretende ao interpoñer o recurso contra o real decreto que acorda nomear ao fiscal xeral do Estado é que se inicie o proceso xudicial, que o nomeamento estea durante varios meses en cuestión", sinalaba a defensa de García Ortiz. E, continuaba, "que a asociación demandante obteña publicidade por medio deste procedemento, que, segundo parece, non ten por outros leitos, e socavar ao Goberno (de quenda) que efectúa o nomeamento, iso si, de modo indirecto".

A coalición celebra a decisión e Feijóo insiste en pedir a súa dimisión ou cesamento

Os partidos da coalición celebran a noticia. Para a deputada de Sumar Aina Vidal, o Tribunal Supremo foi "claro" e considera que "non hai xustificación para esta persecución do fiscal xeral do Estado".

Pola contra, o líder da oposición,  cre que a dimisión ou cesamento de García Ortiz xa tiña que producirse hai tempo. Alberto Núñez Feijóo  considera que o fiscal xeral non dimite porque Pedro Sánchez "necesítao para defender o seu partido, o seu goberno e a súa familia". Segundo o popular, o presidente do Goberno tampouco o cesa "porque, probablemente, o fiscal xeral do Estado fixo o que lle pediu".