O xefe de Gabinete de Facenda nega no TS que recibise 25.000 euros da trama Koldo

Carlos Moreno, o xefe de Gabinete da vicepresidenta primeira e ministra de Facenda, María Jesús Montero, negou este martes ante o Tribunal Supremo (TS) recibir 25.000 euros nun sobre, así como calquera outra cantidade de diñeiro, da denominada trama Koldo, aínda que recoñeceu que trasladou a un asesor do Ministerio a petición que lle fixo o presunto conseguidor, Víctor de Aldama, para que se aprazase o embargo dunha das súas empresas.

Este cargo de Facenda, que compareceu durante preto de media hora ante o xuíz Leopoldo Puente, foi un dos nomes que o presunto conseguidor da trama, o empresario Víctor de Aldama, puxo sobre a mesa, primeiro na Audiencia Nacional e despois no Supremo.

As fontes consultadas sinalan que Moreno negou cobrar diñeiro algún da presunta trama, aínda que admitiu que falou con De Aldama varias veces sobre distintos temas, entre eles a procura de piso, o aeroporto de Ciudad Real e este aprazamento. Respecto a isto último, declarou que llo trasladou a un asesor do Ministerio de Facenda, ao que identificou como Ignacio Granado, e desentendeuse do tema.

Este martes tamén testificou Joseba García, irmán de Koldo, que segundo este último foi quen facilitou a contratación de Jessica, exparella de Ábalos, na empresa pública INECO, porque lle pediu un "favor" para a que definiu como "amiga" de ambos desde antes de que empezase a súa relación co exdirixente socialista.

Con todo, Joseba García desvinculouse deste asunto, asegurando que lle chamaron de INECO para dicirlle que había un recurso dispoñible. Ese recurso sería JRG. Segundo as citadas fontes, a testemuña aseverou que a coñeceu directamente alí, viuna dúas veces. E non era o seu xefe, matizou.

Na mesma liña, desmarcouse da contratación da moza en TRAGSATEC. De feito, asegurou que el non chegou a traballar na devandita empresa e que pode achegar o seu informe de vida laboral para probalo.

Este martes tamén acudiu ao Supremo, Víctor Ábalos, fillo do exministro, para declarar como testemuña. Segundo De Aldama, este asinou contratos de consultoría con "determinadas construtoras" para "xestións de obras adxudicadas no estranxeiro que encubrían comisións por adxudicacións de obra pública en España".

O fillo de Ábalos desmarcouse destas acusacións, á vez que asegurou que nunca traballou no sector público nin con construtoras. Así mesmo, negou participar en xestións sobre o piso situado no Paseo da Castellana de Madrid, valorado en 1,9 millóns de euros. Segundo De Aldama, Víctor "requiriu varias veces información de como se realizaría a transmisión do inmoble".