O xuíz cita a Aldama o 4 de marzo tras a demanda interposta polo PSOE no caso Koldo

O Xulgado de Primeira Instancia 86 de Madrid citou o 4 de marzo o comisionista do caso Koldo, Víctor de Aldama, para que responda á demanda civil que interpuxeron o PSOE e membros do Goberno polas acusacións que verteu contra eles cando declarou en novembro na Audiencia Nacional.

De Aldama foi convocado ese día para un acto de conciliación previo á interposición dunha querela criminal contra el por delitos de inxurias e calumnias.  A querela seguirá o seu curso no caso de que non se retracte do manifestado e non cese "de forma inmediata toda actividade tendente a danar o prestixio, a imaxe e a honra" dos demandantes.

A demanda baséase na declaración que prestou o comisionista o pasado 21 de novembro ante o xuíz do caso Koldo na Audiencia Nacional, Ismael Moreno, en que incriminou varios membros do Goberno e do PSOE en actuacións presuntamente delituosas.

Ferraz di que as acusacións de Aldama son absolutamente falsas, difamatorias, inxuriosas e calumniosas"

A demanda contra Aldama foi interposta ao día seguinte da declaración do empresario no nome do PSOE, do presidente do Goberno, Pedro Sánchez; da súa muller, Begoña Gómez; do presidente da Generalitat de Cataluña, Salvador Illa; da ministra de Facenda, María Jesús Montero, e o seu xefe de gabinete, Carlos Moreno; do ministro de Política Territorial e Memoria Democrática, Ángel Víctor Torres; e do secretario de Organización do PSOE, Santos Cerdán.

Na devandita comparecencia, que lle valeu a De Aldama a súa posta en liberdade tras permanecer un mes en prisión provisional polo caso Hidrocarburos, implicou en actos da trama Koldo ao presidente do Goberno, Pedro Sánchez, á súa muller, Begoña Gómez, e aos membros do Goberno e do PSOE que subscriben a demanda.

Manifestacións que, segundo o escrito, "son absolutamente falsas, difamatorias, inxuriosas e calumniosas" e que atentan "de maneira absolutamente grave contra a honra de importantes membros do Goberno e do PSOE e de Begoña Gómez, cunha "clara intencionalidade de afectar a honra destes a título persoal senón tamén ao Goberno no seu conxunto e ao propio partido socialista".

Na súa declaración ante o xuíz Moreno, De Aldama dixo ter pagado 400.000 euros ao exministro de Transportes José Luis Ábalos, 250.000 ao seu exasesor Koldo García, e que fixo chegar outros 15.000 euros ao secretario de Organización do PSOE, Santos Cerdán, en concepto de mordidas relacionadas con adxudicacións públicas.

Tamén Koldo García, segundo a versión do comisionista, pediría 50.000 euros para o entón presidente canario, Ángel Víctor Torres, pero De Aldama negouse.

Ademais o empresario afirmou que o presidente do Goberno, Pedro Sánchez, era coñecedor da viaxe a España da vicepresidenta venezolana, Delcy Rodríguez, en 2020 e que de feito había prevista unha cea con el e gran parte dos seus ministros.