Odón Elorza dimite como deputado para "evitar desencontros" co PSOE

Odón Elorza presentou a súa dimisión como deputado do PSOE por Gipuzkoa para "evitar desencontros" co partido tras constatar, di, que as súas "achegas e iniciativas parlamentarias" xa "non resultan útiles desde hai un tempo ao Grupo Socialista".

O exalcalde donostiarra fixo pública a súa decisión este luns nunha carta dirixida aos seus compañeiros do Congreso na que explica que a súa renuncia pretende ser "un xesto de lealdade ao Partido Socialista e, á vez, de coherencia" cos seus "ideais".

Elorza explica na carta que chegou o "momento vital" de "facerse a un lado".

"Desexo gozar da vida con máis tempo e liberdade, sen outra disciplina que a ditada polas miñas conviccións", agrega.

Asegura que, como "militante socialista", seguirá "confiando no Goberno de coalición de esquerdas e nas súas políticas socio-económicas, fiscais e redistributivas fronte á crise".

"Contade tamén co meu compromiso de loita activa en defensa da democracia ante o avance dunha dereita reaccionaria e trumpista, así como en defensa dos dereitos cívicos de San Sebastián", subliña.

Edón Elorza publicaba tamén un enlace da carta enviada aos compañeiros de partido na súa conta de Twitter. No chío anunciaba a renuncia ao seu cargo como deputado e engadía unha frase que tamén está incluída na carta "desculpade se algunha vez vos fallei e se a miña voz desafinou".

Hoy he renunciado al cargo de Diputado.

Carta a mis Compañer@s del Congreso:
......
Disculpad si alguna vez os fallé y si mi voz desafinó.https://t.co/UvXdEqoPjl

— Odón Elorza (@odonelorza2011) January 30, 2023

Odón Elorza, quen perdeu o pasado mes de outubro as primarias do PSE-EE para volver ser candidato á Alcaldía de San Sebastián, lembra na súa carta que deixa na súa páxina web unha "obrigada rendición de conta" na que detalla o seu traballo como deputado desde 2012.

Elorza, quen fará efectiva a súa renuncia ao cargo este mesmo martes, despídese dos seus compañeiros cun "abrazo fraternal".