Os sindicatos franceses manterán a presión ata que se retire a reforma das pensións

Os sindicatos franceses advertiron este xoves ao Goberno que manterán a presión e as súas mobilizacións mentres non se retire a reforma das pensións, mesmo se o Consello Constitucional a valida a semana próxima.

"Pase o que pase, a mobilización continuará mentres non se retire a reforma", subliñou a nova líder da Confederación Xeral do Traballo e segunda central do país, Sophie Binet, ao comezo da manifestación organizada en París.

Binet explicou que esta undécima xornada nacional de protesta en menos de tres meses, organizada de forma conxunta por todos os sindicatos, "mostra que a determinación continúa" contra unha reforma que atrasará de 62 a 64 anos a idade mínima de xubilación e que, á súa parecer, "é inxusta e innecesaria".

Insistiu en que non ten "ningunha xustificación" económica, que é o principal argumento utilizado polo Goberno para defendela, e tampouco "lexitimidade", á vista da oposición popular.

Nunha liña paralela, o secretario xeral da Confederación Francesa Democrática do Traballo (CFDT, primeiro sindicato), Laurent Berger, subliñou que "este movemento segue contando co apoio da poboación" e que "o rexeitamento a esta reforma segue sendo igual de forte".

Berger anticipou que o seu sindicato non cuestionará a lexitimidade do ditame do Consello Constitucional sobre se a lei que formaliza a reforma das pensións, "gústenos ou non".

Pero engadiu que "iso non quere dicir que deixemos de dicir o que pensamos desta reforma".

O líder da CFDT volveu reafirmarse en que en Francia hai "unha crise democrática". Estas palabras provocaron a reacción de Macron, de visita oficial na China.

Nesta nova xornada de mobilización nacional hai convocadas preto de 250 manifestacións por todo o país, nas que a policía espera menos participación que na precedente, o martes da semana pasada, na que houbo 740.000 persoas, segundo o Ministerio do Interior e máis de dous millóns, segundo a CXT.