A UE vetará o petróleo ruso deixando fóra o oleoducto que abastece Hungría

O petróleo que Hungría, Eslovaquia e República Checa compran a Rusia por oleoduto quedará fóra do sexto paquete de sancións da Unión Europea ao Kremlin, tal e como esixía o primeiro ministro húngaro Viktor Orbán para que o seu país aceptase o veto ao cru de Moscova.

A falta de finalizar os detalles do embargo, os xefes de Estado e de Goberno do club europeo acordaron incluír unha "excepción temporal" para o cru que transita polo oleoduto Druzhba cara a eses tres países, pero o texto de conclusións non especifica ningún límite temporal para esta derrogación e limítase a dicir que se tratará "canto antes".

Por tanto, o embargo vetará antes do final do ano todas as importacións de petróleo ruso por barco, que supoñen dous terzos do total. Alemaña e Polonia, pola súa banda, comprometéronse a non comprar cru que transita polo ramal norte do oleoduto Druzhba, o cal supón na práctica que o 90 % das compras queden recollidas polo acordo.

"Queremos parar a máquina de guerra rusa, parar o financiamento das capacidades militares rusas poñendo en marcha sanciones que buscan facer presión no Kremlin", salientou nunha rolda de prensa o presidente do Consello Europeo Charles Michel.

Na mesma comparecencia, a presidenta da Comisión Europea Ursula von der Leyen explicou que os Estados membros seguirán "traballando" para definir o calendario da excepción húngara, pero destacou que o acordo parcial supón "un gran paso adiante" nas sancións europeas, que ademais se suma ao veto ao carbón adoptado no anterior paquete. 

A Comisión Europea dálle moito valor ao acordo como medida de máxima presión a Rusia para que finalice a guerra.  "Estou moi contenta de que foramos capaces de acordar o sexto paquete de sancións", dixo a presidenta da Comisión. "É moi importante". 

Hoxe agárdanse máis reaccións dos diferentes estados. O Goberno español trasladou que están satisfeitos polo acordo, porque se mantén a unidade dos 27 ante sancións cada vez máis delicadas. E remiten á rolda de prensa de Pedro Sánchez hoxe en canto remate o cumio. 

Tamén se agarda a reacción de Moscova. De momento, segue cumprindo as súas ameazas sobre o gas e dende hoxe córtalle o subministro a Países Baixos por negarse a pagalo en rublos.  Sería o cuarto país vetado por Rusia, despois de Polonia, Bulgaria e Finlandia.