Os ministros de Exteriores do G5+ reúnense este luns en Madrid para falar da defensa de Europa

Cuarta reunión do G5+, que agrupa os ministros de Exteriores de Francia, Alemaña, Italia, Polonia, España, Reino Unido e Ucraína,  un grupo creado para impulsar a defensa de Europa ante a ameaza de Rusia e os cambios na estratexia dos EE.UU. na seguridade euroatlántica.

Despois das reunións de Varsovia o 19 novembro de 2024, Berlín o 12 decembro 2024 e París o 12 febreiro deste ano, este luns será Madrid a anfitrioa da reunión do G5+. A esta xuntanza tamén foi convidada a alta representante de Asuntos Exteriores da Unión Europea, Kaja Kallas.

O obxectivo destes encontros, desde que se puxeron en marcha, foi facilitar o diálogo e a concertación sobre temas que afectan á seguridade en Europa e, en particular, o apoio a Ucraína, segundo informa Asuntos Exteriores.

Sobre a mesa estarán temas como o plan de rearmamento europeo que pretende mobilizar ata 800.000 millóns de euros na defensa e seguridade da UE, os últimos movementos sobre a tregua enerxética e o cesamento do fogo temporal no Mar Negro que acordaron Rusia e Ucraína, aínda que ambos se acusan de non respectala.

O encontro dos responsables de Exteriores terá lugar no Palacio de Viana, unha das sedes do Ministerio de Asuntos Exteriores, Unión Europea e Cooperación, a partir das 11:00 horas.