Os veciños do Valadouro recrean a Paixón de Cristo nun viacrucis vivente cheo de realismo e crueza
É o único que se fai na Mariña e atrae cada vez máis visitantes
Coma cada Mércores Santo desde hai máis de dúas décadas, os veciños do Valadouro recrearon a Paixón de Cristo no tradicional viacrucis vivente que se fai na parroquia de San Tomé de Recaré.
Seguindo as catorce cruces de pedra que hai no camiño que sobe á igrexa, representan, con realismo e crueza, as catorce estacións do viacrucis, desde a sentenza a morte de Cristo ata a sepultura.
O viacrucis promóveo a asociación xuvenil Juventud en Marcha. Na representación participan un cento de veciños do Valadouro e tamén de Alfoz, a maioría, mozos e mozas.
O do Valadouro é o único viacrucis vivente que se fai na Mariña. Con máis de vinte anos de percorrido, atrae cada vez máis visitantes.
