Pedro Sánchez defende o pacto con Esquerra despois de despachar co rei

O presidente do Goberno, Pedro Sánchez, asegurou este martes que o preacordo entre o PSC e ERC para a investidura de Salvador Illa é "bo para Cataluña e para España" e subliñou que o texto recolle o compromiso coa "solidariedade interterritorial" e a "igualdade entre españois".

Nunha rolda de prensa tras o despacho de verán co rei Felipe VI no Palacio da Almudaina, en Palma de Mallorca, Sánchez cualificou como unha "extraordinaria noticia" este preacordo, que prevé un sistema de financiamento "singular" para Cataluña, fronte ás críticas do PP e dalgúns líderes territoriais socialistas.

"O punto de vista que podo trasladar, e así está recollido no acordo, é o compromiso da solidariedade interterritorial, o compromiso da calidade e da cohesión dos servizos públicos e, por tanto, da igualdade entre españois", engadiu. 

 

Non se pronunciou sobre a súa querela contra o xuíz Peinado

O presidente do Goberno emprazou á súa comparecencia deste mércores na que fará balance do curso político para referirse á investigación do xuíz Juan Carlos Peinado contra a súa esposa, Begoña Gómez, e á querela por prevaricación que presentou contra el a través da Avogacía do Estado.

O xefe do Executivo sinalou que se debe comprender que despois dun despacho co monarca "non deba nin poida" referirse a ese asunto.

Lembrou que este mércores fará balance no Palacio da Moncloa do curso político e será aí onde falará sobre iso.

"Polo respecto que debo ao despacho que tiven co xefe do Estado, sobre esta cuestión non vou dicir nada ata o día de mañá e referirme loxicamente ao contido do que expuxo a Avogacía Xeral do Estado", insistiu.

Castela A Mancha recorrerá a amnistía ante o Constitucional

O Consello de Goberno de Castela-A Mancha aprobou este martes a interposición dun recurso de inconstitucionalidade contra a lei de amnistía e autorizou ao gabinete xurídico o exercicio de accións para formalizar o recurso.

O Executivo autonómico tomou esta decisión tras estudar o ditame do Consello Consultivo solicitado polo presidente do Goberno de Castela-A Mancha, Emiliano García-Page, o pasado 14 de xuño. 

As conclusións do ditame son "contundentes" respecto á inconstitucionalidade da norma e a lexitimidade da comunidade autónoma para presentar este recurso, informou a Junta nunha nota de prensa.