Sánchez ve na amnistía "valores" da Constitución e cre que "pagará a pena"

O presidente do Goberno, Pedro Sánchez, defendeu que a lei de amnistía "demostra os principios e os valores" da Constitución e que a súa aprobación "merecerá a pena para a sociedade catalá e española".

"É un paso transcendente da democracia española", afirmou nunha entrevista que este domingo publica La Vanguardia, e unha vía para "superar, desde a política, crise" como a catalá.

O xefe do Executivo amosouse convencido de que "os indultos, a reforma do Código penal e a amnistía son pasos nunha liña coherente", aínda que admitiu cambiar "de posición" sobre a lei que chegará o martes ao pleno do Congreso.

Concentración contra a norma

De feito, coincidindo coa concentración convocada este domingo polo PP en Madrid contra esta norma, augurou que "cando se vexan os efectos beneficiosos da amnistía, moitos dos políticos que hoxe se manifestan nas rúas de España farán bo o dito de 'Se te vin, non me acordo'".

Sánchez sinalou que "o esforzo por normalizar a situación en Cataluña fai que a nosa democracia sexa máis forte ao incorporar a Junts ou a ERC a contribuír de forma construtiva á gobernabilidade do país".

Tamén afirmou que se reunirá "non unha vez, senón máis" co expresidente catalán e agora eurodeputado, Carles Puigdemont, e con quen fora o seu vicepresidente e actual presidente de ERC, Oriol Junqueras, unha vez aprobada a lei.  Será "un acto consecuente e coherente".

Auto de Castelló

Ao preguntarlle sobre o último auto do xuíz Manuel García Castelló, dixo que non lle corresponde valorar "investigacións sub iudice", pero engadiu: "É verdade que o independentismo utilizou estratexias reprobables, pero creo que iso non é terrorismo".

"A democracia española, afortunadamente, hai 13 anos que venceu o terrorismo. Iso nada ten que ver cunha lei de amnistía que pretende superar as consecuencias xudiciais dun erro que cometeron quen gobernaba na Generalitat e no Goberno de España", agregou.

Operación Cataluña

Tamén se referiu á denominada operación Cataluña, unha "guerra sucia" contra o independentismo durante o goberno popular de Mariano Rajoy.

Ao seu xuízo, o actual líder do PP, Alberto Núñez Feijóo, responde a este tema cun "silencio estrondoso", o que demostra, segundo Sánchez, a súa "falta de autonomía" e que "se estivesen no Goberno, volverían facelo".

Ao tempo, arremeteu contra unha "fachosfera" que se dedica a "polarizar, insultar e xerar unha desconfianza cun fin claro". Na súa opinión, "a dereita ten un naufraxio de ideas. Están parasitados pola ultradereita".