Pesar no mundo da cultura pola morte da poeta portuguesa Ana Luísa Amaral
Galardoada co Raíña Sofía de Poesía Iberoamericana vai ser homenaxeada na feira do libro do Porto
A poeta lisboeta Ana Luísa Amaral, unha das voces máis destacadas do xénero na actualidade en Portugal, faleceu o venres aos 66 anos como consecuencia dunha prolongada enfermidade.
Amaral foi investigadora e profesora de literatura angloamericana da Facultade de Letras da Universidade de Porto Centro, pero xa estaba xubilada. Tamén se dedicou á tradución.
Viviu a maior parte da súa vida no norte de Portugal e publicou máis dunha vintena de libros de poesía, teatro, novela, literatura infantil e ensaio. Figura clave no movemento e nos estudos feministas, coautora do primeiro Dicionário de Crítica Feminista e a edición comentada do clásico contemporáneo Novas cartas portuguesas.
Escribiu obras poéticas traducidas a diversas linguas, entre elas o castelán, como Escuro, Ara, O olhar diagonal das coisas.
Premio Raíña Sofía
En maio de 2021 Patrimonio Nacional e a Universidade de Salamanca concedéronlle o XXX Premio Raíña Sofía de Poesía Iberoamericana. Recibiu moitos outros galardóns como o da Asociación de Escritores Portugueses de 2008, o Premio Giuseppe Acerbi de Italia e o Literario Casino da Póvoa, os dous en 2007 e o Premio Leteo en 2020.
En abril a Asociación de Escritoras e Escritores en Língua Galega (AELG) nomeouna escritora Galega Universal. A feira do libro do Porto a finais de mes homenaxeará a súa obra e figura.
En 2020 lanzou What´s in a Name, o mellor libro de poesía para os libreiros madrileños. Amaral traduciu a Shakespeare e Emily Dickinson, sobre a que realizou a súa tese de doutoramento.
