O Goberno cre que ao PP lle chegou a hora de excluír a Vox

O Goberno cre que ao PP lle chegou a hora de excluír a Vox e Pedro Sánchez volveu a tender a man a Pablo Casado no Congreso para que poida contar co apoio dos socialistas nun futuro goberno en Castela e León a condición de que os populares rompan coa ultradereita "para sempre" e "en todos os territorios".

Algúns socios de investidura como ERC avisan o Executivo do risco de que Vox acabe ocupando os asentos do PP. No primeiro cara a cara do presidente do Goberno, Pedro Sánchez, co líder do PP, Pablo Casado e co dirixente de Vox, Santiago Abascal, tras as eleccións en Castela e León, o xefe do Executivo profundou na idea dunha hipotética abstención socialista na investidura do candidato do PP á Junta de Castela e León, Alfonso Fernández Mañueco, se Casado exclúe a Vox "en todos os seus territorios".

"Chegoulle a hora da verdade, señor Casado", recalcou Sánchez. O certo é que o presidente do PP non respondeu a Sánchez e eludiu a luva que lle volveu a lanzar o Executivo. Nos corredores do Congreso varios membros do Goberno insistiron en que a Vox non hai que facerlle un "cordón sanitario" senón "un cordón democrático".

"Viríalle ben a España", sinalou a portavoz do Goberno, Isabel Rodríguez, mentres a vicepresidenta segunda e ministra de Traballo, Yolanda Díaz, lamentaba que a ultradereita queira entrar no Goberno de Castela e León derrogando a lei contra a violencia de xénero: "É a peor noticia que a extrema dereita poida decidir sobre a vida das mulleres, a educación dos nosos fillos ou a sanidade publica", recalcou.