Protagonismo para os Reis no Día das Forzas Armadas celebrado en Granada
Protagonismo para os Reis no Día das Forzas Armadas celebrado en Granada
A capital granadina viviu o desfile coa implicación de decenas de miles de persoas
Desde o Ministerio de Defensa aclaran que o panorama electoral non vai frear os investimentos para modernizar as Forzas Armadas
Dúas horas antes de chegaren os Reis, as marxes das rúas granadinas polas que pasou o desfile este mediodía xa estaban ateigadas de xente. Os monarcas foron recibilos pola ministra de Defensa, Margarita Robles e o presidente andaluz Juanma Moreno, entre outras autoridades.
Pedro Sánchez non adoita acudir aos actos do Día das Forzas Armadas, pero si acode cada ano aos desfiles militares do 12 de outubro.
Esta cerimonia conmemoraba tamén o 35 aniversario do acceso das mulleres ao Exército e unha delas foi protagonista. Saltou desde unha aeronave da Patrulla Acrobática de Paracaidismo, na compaña dun cabo, e portou a bandeira de España, que se izou posteriormente. A aterraxe sucedeu no punto previsto.
Despois celebrouse a tradicional ofrenda aos caídos, cunha homenaxe especial aos falecidos no último ano, seguida dunha pasada da Patrulla Águila. A parada aérea e terrestre contou coa participación, en conxunto, de 3.180 militares, 86 aeronaves e 152 vehículos terrestres.
Un dos temas que xurdiu no desfile foi o do adianto electoral, que deixa no aire importantes programas de investimento para modernizar o armamento.
Desde o Ministerio de Defensa salientábase este sábado que non se frearán, porque as Forzas Armadas "non son de ningún partido político" e investir neste eido é facelo en "seguridade e en postos de traballo na industria española".
