Renfe lanza billetes a menos de 30 euros para viaxar ao entroido de Ourense dende Madrid

Renfe pon á venda billetes de tren a menos de 30 euros para viaxar de Madrid a Ourense durante os días grandes do Entroido. 

A oferta está dispoñible para viaxar a Ourense o sábado do Entroido e regresar a Madrid o domingo á primeira hora da mañá. 

“Que sexa máis a miúdo este tipo de oferta, xa que atrae moita xente do centro de España que nos pode visitar e mellorar o comercio e a hostelería", explica Francisco Javier Outomuro, da Unión de Hostaleiros de Ourense.

Os prezos dos billetes non superan os 30 euros por traxecto nos tres servizos en promoción, aínda que este luns podían atoparse máis baratos. A venda manterase ata esgotar as prazas dispoñibles.

"Pode axudar sempre que se promova ben, é dicir, o que hai que promover é o sentido cultural do Entroido, non o vende festa", indica Rosa Dorado, xerente da empresa turística Genuine Galicia.

Esta promoción especial busca dar a coñecer unha das festas máis emblemáticas e tradicionais da provincia ourensá e atraer visitantes do centro de España.