Rueda, o sucesor natural que garante a continuidade
Rueda, o sucesor natural que garante a continuidade
Como futuro presidente da Xunta aspira a manter o legado político de Feijóo “con estilo Rueda”
O novo presidente que gobernará Galicia é afiliado do PP dende moi novo e traballou 16 anos ao lado de Alberto Núñez Feijóo, sempre na discreción. Un tándem político que se fraguou primeiro na oposición e despois no goberno da Xunta.
De perfil neutro e sen tensións coas baronías provinciais, así o cualifican os seus compañeiros de partido. El defínese nas súas redes sociais como amante do deporte, sobre todo do ciclismo, moteiro e moi familiar.
Foi en 2012 cando Rueda se estreou como vicepresidente do executivo galego, un cargo que ostentou dende entón. Tamén ocupou a Consellería de Presidencia, Xustiza e Turismo, que nesta lexislatura estivo marcada polo Xacobeo extraordinario de dous anos.
Tamén foi secretario xeral do PP ata o nomeamento en 2016 de Miguel Tellado. Rueda centrou o seu papel no partido na provincia de Pontevedra. Agora o salto de Feijóo ao PP nacional deixa a Rueda á fronte por consenso.
Anunciaba oficialmente hai unha semana a súa candidatura para dirixir o PP galego. "Galicia, o camiño a seguir" é o slogan elixido e xa apunta as liñas do cargo que asumirá tamén en San Caetano coa presidencia da Xunta: "Ten que haber unha continuidade do estilo Feijóo, pero espero que haxa un estilo Rueda (...) que se verá no organigrama", dixo.
