Rueda volve rexeitar a condonación da débeda e a oposición pídelle rectificar

A Xunta rexeitará mañá no Consello de Política Fiscal e Financeira (CPFF) a condonación da débeda como solución ao problema de infrafinanciamento que ten Galicia. Alfonso Rueda lembra que as quitacións que promete o Goberno deberán ser asumidas por todos os españois. E lamenta que ese sexa o único punto do día no CPFF que se vai celebrar este mércores.

O presidente da Xunta defende que Galicia fixo os deberes en axustes financeiros cando tocaba e que non precisa dunha condonación da débeda. Lamenta que esa sexa a única proposta que leve o Goberno ao Consello de Política Fiscal para contentar a Cataluña.

Alfonso Rueda reitera que o que pide a Xunta é un novo modelo de financiamento autonómico no que Galicia reciba polo menos 500 millóns de euros máis para custear os servizos públicos, e lembra que a débeda que prevé perdoar o Goberno ás comunidades non desaparece.

A oposición pide rectificar

Os partidos galegos da oposición, tanto o PSdeG como o BNG, defenden o perdón da débeda. Ana Pontón Pontón lembra que formaba parte do acordo de investidura asinado co PSOE.

A portavoz nacional do BNG pediulle ao presidente da Xunta que rectifique e non renuncie á condonación da débeda que ofrece o Goberno, xa que iso supoñería facer perder a Galicia 4.000 millóns de euros por "submisión" e "servilismo" ao PP.

Pola súa banda José Ramón Gómez Besteiro di que cos cartos se poden financiar moitos servizos e bota as contas do destino que se podería dar a todo ese diñeiro.

O secretario xeral do PSdeG lamentou que o presidente da Xunta sexa o único galego que "di non" á condonación da débeda á comunidade que ofrece o Goberno, unha posición coa que se "equivoca totalmente".

Pola contra, o conselleiro de Facenda, Miguel Corgos, cre que vai contra os intereses de Galicia e avanza que pedirá explicacións a ministra de como fixo para establecer os criterios de repartición dos cartos.