Rusia intensifica os ataques a Odesa para bloquear o litoral ucraíno
Rusia intensifica os ataques a Odesa para bloquear o litoral ucraíno
A ONU acusa a Rusia de poñer en risco a seguridade alimentaria dos países en desenvolvemento
![Unha imaxe de Odesa tras os últimos ataques rusos](https://img-g24-crtvg.flumotion.com/prog24/2023/20230722/202307208558WD-UKRAINE-CRISISATTACK-ODESA-MORE_O__frame_2008.png)
Rusia intensificou os ataques que leva a cabo a diario desde o martes contra a cidade portuaria de Odesa, co lanzamento de dúas roldas de mísiles nunha soa xornada, no marco da súa operación para bloquear a costa ucraína do Mar Negro tras saír do acordo do gran.
Durante catro noites seguidas, as forzas rusas castigaron con mísiles e drons instalacións portuarias dedicadas á exportación de cereais e outras infraestruturas da industria agrícola ucraína, pero o segundo ataque deste venres foi a plena luz do día.
A ONU acusou a Rusia de poñer en risco a seguridade alimentaria nos países en vías de desenvolvemento coa súa decisión de retirarse dos chamados acordos do Mar Negro e os seus repetidos bombardeos contra portos ucraínos.
"Os acontecementos da última semana son só os últimos desenvolvementos na guerra sen sentido da Federación Rusa contra o seu veciño, unha guerra con consecuencias que se senten en todo o mundo", dixo a xefa de Asuntos Políticos das Nacións Unidas, Rosemary DiCarlo.
![](https://img-g24-crtvg.flumotion.com/prog24/2023/20230722/202307218898WD-UKRAINE-CRISISGRAINS-UN_O__frame_9066.png)