Sánchez ve España "preparada" para recoñecer o estado palestino

O presidente do Goberno, Pedro Sánchez, subliñou este mércores que “España está preparada para recoñecer a Palestina”, na súa comparecencia ante o Congreso dos Deputados para informar sobre a política exterior.

Sánchez explicou que o Estado palestino debe ser recoñecido porque “é o xusto, demándao a maioría social e polo interese xeopolítico de Europa” e porque "a comunidade internacional non poderá axudar ao Estado palestino se non recoñece a súa existencia".

Por iso, tanto el como o ministro de Exteriores, José Manuel Albares, están a realizar xiras por países da UE e de Oriente Medio para sumar apoios para o recoñecemento de Palestina.

Así, lembrou que este venres comeza unha xira por países europeos para que se somen á iniciativa española, unha proposta que, segundo dixo, cada vez gaña máis adeptos convencidos de que só co recoñecemento do Estado palestino poderase garantir a paz e a seguridade na rexión.

Por iso, España propuxo un cesamento do fogo permanente, a apertura inmediata de corredores humanitarios, a celebración dunha conferencia internacional de paz e a solución dos dous estados, explicou, antes de lamentar que haxa moito líderes tanto en Europa como en España que se puxeron "de perfil".

Pero "afortunadamente, a maioría dos Estados abriron os ollos" e está a se sumar á posición española, asegurou.

Sánchez aposta por investir máis en defensa como elemento de disuasión

O presidente do Goberno, Pedro Sánchez, ratificou este mércores ante o pleno do Congreso a súa aposta por aumentar o investimento en materia de defensa para ter máis capacidade de disuasión.

Debuxou o xefe do Executivo un complicado panorama xeopolítico como consecuencia de conflitos como o de Ucraína e o de Oriente Próximo, onde insistiu en que Israel está a ter unha resposta "desproporcionada" tras o ataque terrorista de Hamas.

"Necesitamos reforzar a nosa capacidade de disuasión non para ser temidos, non para arrastrar ao mundo a ningunha carreira armamentística, senón para ser respectados, para protexer ese gran proxecto de paz, democracia e liberdade que é Europa", engadiu.

Nese contexto dixo que España quere xogar o papel que lle corresponde como cuarta economía de Europa e cuarto país da UE co exército máis grande, e como sede de importantes industrias de defensa. "Polo tanto, debemos continuar aumentando o noso investimento e mellorar a coordinación das nosas Forzas Armadas coas dos estados membros", recalcou.

Respecto a Ucraína, volveu a defender que se manteña o apoio a este país ante a ofensiva de Rusia e apelou a aproveitar o impulso que require esa axuda e os compromisos coa OTAN para modernizar as capacidades de defensa.

Sánchez referiuse á visita que realizou en febreiro a Marrocos para asegurar que con ela reforzouse a colaboración policial, financeira e empresarial con este país.

O presidente do Goberno subliñou que pretende seguir reforzando tamén a competitividade económica de España coa continuidade da política que está a levar a cabo neste ámbito e que asegurou que está a reducir a desigualdade. 

Feijóo defende os dous Estados pero acusa a Sánchez de soberbia con Palestina

 O líder do PP, Alberto Núñez Feijóo, defendeu a solución dos dous Estados para o conflito entre Israel e Palestina, pero acusou o presidente do Goberno de aplicar "soberbia" e "brocha gorda" ao propoñer o recoñecemento unilateral de Palestina.

"Abandone a soberbia de crer que é unha soa persoa quen poida arranxar nun mes un conflito de 80 anos", reclamou Feijóo este mércores na súa réplica á comparecencia do xefe do Executivo no Congreso dos Deputados.

Feijóo defendeu que o PP segue no consenso alcanzado no Congreso en 2014, apostar pola solución dos dous Estados, pero agregou que o como e o cando é clave e que é necesario que esta solución sexa o resultado dun proceso negociador e o apoio de máis países "de peso". 

Ademais, sostivo que a diferenza do que ocorría en 2014 nos escanos azuis do Goberno sentan "persoas comprensivas co vil ataque da organización terrorista Hamas" do 7 de outubro.

Feijóo acusou ademais a Sánchez de empregar a política exterior como "devasa dos seus problemas internos", pero advertiulle de que o PP non vai obviar a amnistía, a corrupción, a "chantaxe" dos seus socios, o referendo ou o empobrecemento dos españois.

Polas alusións á paz do presidente, Feijóo ironizou con que Sánchez pareceu "por momentos a reencarnación" de Mahatma Gandhi, aínda que este foi coherente mentres que o líder do PSOE é ao seu xuízo hipócrita porque quería eliminar o Ministerio de Defensa e é quen máis gastou en armamento.

Por último, o presidente do Goberno, Pedro Sánchez, subliñou este mércores que o Executivo "seguirá traballando" pese ao "lodo", o "ruído" e a "crispación" da que acusa á dereita, aínda que recoñeceu que lle gustaría ter unha oposición "menos tóxica" e unha aritmética parlamentaria "máis folgada".

"Algúns queren ocultar esta realidade baixo o lodo, queren ocultar os bos resultade do Goberno e a súa ausencia de proxecto político baixo o ruído, a calumnia e a crispación, usando técnicas trumpistas e bolsonaristas, as dunha internacional ultradereitista que trata de debilitar a nosa democracia e intoxicar o debate público", dixo.