Sánchez anuncia a creación dunha empresa pública para construír vivenda
Sánchez anuncia a creación dunha empresa pública para construír vivenda
Pedro Sánchez fixo este anuncio na clausura do 41 Congreso Federal do PSOE, en Sevilla
O presidente do Goberno tamén dixo que impulsarán a redución de xornada nesta lexislatura
Pedro Sánchez na clausura do Congreso do PSOE en Sevilla, este domingo
O presidente do Goberno e secretario xeral do PSOE, Pedro Sánchez, anunciou este domingo que o executivo creará unha grande empresa pública para a construción e xestión de vivenda desde a Administración Xeral do Estado.
Sánchez fixo este anuncio na clausura do 41 Congreso Federal do PSOE celebrado en Sevilla durante a fin de semana e no que renovou a dirección do partido.
No peche do congreso e perante os 7.000 asistentes lamentou os ataques sucesivos ao partido e ao executivo e engadiu que responderá actuando no Boletín Oficial do Estado cunha nova política progresista.
No seu discurso especificou que se sofren ataques coa lei de vivenda responderán con medidas como a que anunciou en Sevilla: a creación dunha grande empresa pública de vivenda.
Engadiu tamén Pedro Sánchez que se atacan o feminismo responderán coa renovación do Pacto de Estado contra a Violencia de Xénero, e que se critican a reforma laboral, impulsarán a redución de xornada nesta lexislatura.
Sánchez, aclamado de novo neste Congreso como secretario xeral do PSOE e sen rival interno, deu as grazas á militancia por "dar sempre a cara", nos bos momentos e tamén nos malos, cando hai que defender a verdade ante "tanta mentira" e a democracia "ante as condutas autoritarias" que se están vendo na política española.
Para rematar, Pedro Sánchez asegurou que a militancia é o corazón do proxecto socialista e garante a autonomía de partido.
