Sánchez está presente na campaña en Cataluña, con visións moi diverxentes
Sánchez está presente na campaña en Cataluña, con visións moi diverxentes
Puigdemont, Yolanda Díaz e Abascal falaron da paréntese de Sánchez desde perspectivas contrapostas
A campaña de ERC trasladouse a Xenebra para falar do exilio e eludiu o tema
Esquerra Republicana celebrou este domingo en Suíza unha xornada sobre o exilio coa presenza de Marta Rovira. Pere Aragonès incidiu en que a proposta de ERC foxe dos personalismos e apelou á resistencia fronte á extrema dereita.
"A proposta política que merece máis confianza o 12 de maio para resistir ante a extrema dereita é a que resistiu durante 93 anos de historia, que somos nós. A nosa vida é de resistencia ante a extrema dereita, o partido mais represaliado, cun presidente fusilado".
Mentres, Carles Puigdemont dixo que o 12 de maio algúns levarán labazadas porque triunfará o sentido de país en Cataluña. E deixou unha mensaxe en clave do que vai decidir mañá Sánchez.
"A nós si que nos interesa o futuro, pero o futuro de Cataluña, non o futuro dun partido político, non o futuro dunha persoa. Interésanos o futuro dos nosos fillos e das nosas fillas. Interésanos a independencia do noso país".
Santiago Abascal cargou en Tarragona contra Pedro Sánchez e dixo que o que está facendo é indignante:
"Dános igual o que faga o luns, porque todo o que vai facer, se quede ou se vaia, é en contra dos intereses de España, que é o que fixo sempre, porque non ten nin un só escrúpulo, non ten nin un só principio".
Desde os Comúns-Sumar, Yolanda Díaz aludiu a Sánchez e apostou por un tsunami democrático fronte á onda reaccionaria:
"Xa España se está mobilizando, non para salvar un partido, non para salvar o Goberno de coalición, senón sabedes para que? Para seguir gañando máis dereitos, así que hoxe somos máis fortes ca nunca".
