Scholz chama á unidade en Europa no 35º aniversario da caída do muro de Berlín

O chanceler alemán fixo este sábado un chamamento á unidade en Europa, nun contexto internacional marcado por importantes desafíos internacionais, na súa mensaxe para conmemorar o 35º aniversario da caída do muro de Berlín.

"Especialmente agora, cando a situación política mundial é tan difícil, xa sexa en Ucraína ou en Oriente Medio, en materia de protección do clima ou económica, é precisamente agora cando os europeos debemos permanecer unidos (...) Os europeos podemos considerarnos afortunados por vivir hoxe xuntos estes valores. Unha mirada á nosa historia e ao mundo que nos rodea demostra que isto non pode darse por sentado", asegurou.

Segundo subliñou nunha intervención gravada en Budapest, onde participou no último cume informal dos líderes da UE, a mensaxe "da revolución pola liberdade de 1989" que tombou o muro levantado pola extinta República Democrática de Alemaña (RDA) segue vixente:

"O valor, a confianza e a cohesión dan os seus froitos, os uns contra outros non logramos nada, só xuntos somos fortes".

Scholz asegurou que a celebración da caída do muro de Berlín, un feito clave na historia de Alemaña, non só ten relevancia a nivel nacional.

"Cando esta fin de semana celebramos en Berlín e en toda Alemaña a caída do muro de Berlín, celebramos tamén a contribución dos nosos veciños de Europa central e oriental", sinalou o chanceler, que aludiu ao labor contra o réxime comunista en Polonia do sindicato Solidarnosc ou a chamada 'Revolución Cantada', que levou os países bálticos a recuperar a súa independencia.

"A vitoria da liberdade do outono de 1989 foi unha vitoria conxunta de Europa", destacou Scholz, para quen a caída do muro, construído no 1961, foi "a feliz culminación dun desenvolvemento paneuropeo". 

Actos conmemorativos

A guerra de Rusia contra Ucraína marcou este sábado os actos conmemorativos co gallo do 35º aniversario da caída do Muro de Berlín, unha infraestrutura que partiu a cidade durante case tres décadas e que simbolizou a división e as tensións da Guerra Fría.

As autoridades, acompañadas polo presidente da República, Frank-Walter Steinmeier, protagonizaron, xunto a 300 cidadáns, celebraron a caída daquela fronteira da extinta República Democrática de Alemaña (RDA) sen esquecer a actual defensa da poboación ucraína.

"Os valores da revolución de 1989 son os defendidos no campo de batalla de Ucraína", dixo Alexander Klausmeier, director da Fundación do Muro de Berlín no espazo memorial dedicado a aquela barreira, xunto a unha torre de vixilancia preservada para evitar o esquecemento.

"A ilegal guerra de agresión de Putin mata, causa dor e ameaza os nosos valores de liberdade", engadiu Klausmeier, antes de que o alcalde-gobernador da capital alemá, Kai Wegner, amosara a súa solidariedade con Kíiv no seu discurso.

"Temos que estar ao lado das persoas que loitan pola súa liberdade e pola súa supervivencia en Ucraína", dixo Wegner baixo a mirada de Steinmeier, Klausmeier e unha nutrida delegación internacional composta, entre outros, por opositores a réximes ditatoriais como Cuba, Irán, Bielorrusia, Xeorxia ou A China.

Dita delegación tamén contaba con representantes do sindicato Solidarnosc, organización sindical que foi clave na caída do comunismo en Polonia e que este sábado foi presentado como outra das forzas que posibilitou a caída do muro de Berlín.

"Os opositores polacos e os da Alemaña do leste traballaron unidos para conseguir os mesmos obxectivos: eleccións libres, liberdade, dereitos humanos", lembrou Klausmeier.

Música contra o "muro antifascista" da RDA

Ao remate dos actos oficiais, nun pequeno escenario, soou en directo a canción People have the power de Patti Smith, dando comezo a unha fin de semana de celebracións na que a música tamén será protagonista. Preto de 700 músicos van participar en diferentes concertos.

O muro de Berlín foi concibido polo réxime da RDA como a máis emblemática das barreiras de "protección antifascista", segundo os termos do réxime comunista.

En realidade, foi construído maiormente para evitar a sangría demográfica á que se enfrontaba o réxime, pois, pese ao apoio da Unión Soviética, viu como ata 2,5 millóns de persoas fuxiron cara á Alemaña Occidental entre 1949 e 1961, unha perda de capital humano que puxo en dúbida a viabilidade económica da xa desaparecida ditadura xermana.

A infraestrutura que dividiu Berlín sumaba 155 quilómetros, dos cales hoxe só quedan en pé algúns anacos en distintos puntos da cidade: na coñecida como "East side Gallery" (famosa polas súas numerosas e icónicas pintadas), nas proximidades do museo histórico Topographie deas Terrors ou no Memorial do muro, onde este sábado se citaron o presidente alemán e o resto de autoridades.