Sen esperanzas de atopar superviventes en Marrocos

A primeira axuda humanitaria chega a Talat N'Yacoub. Foi unha das vilas máis duramente golpeadas polo sismo do pasado venres: os superviventes tiveron que agardar catro días para recibir alimentos, medicinas e mantas.

Das dez provincias afectadas, a de Al-Haouz é a única onde seguen aparecendo cadáveres. Xa van 2.900. Pouco a pouco, os camións do exército vanse abrindo paso cara ás aldeas máis remotas do Alto Atlas. En moitas delas, os propios veciños iniciaron o desentullo cos seus propios medios.

A Cruz Vermella lanzou este martes un chamamento á comunidade internacional. Necesitan 100 millóns de euros para atender as necesidades máis urxentes de alimentos, refuxios e sistemas de saneamento de auga.

Marrocos segue rexeitando moita da axuda internacional que se lle ofrece, como a de Francia, a antiga metrópole, ou a de Alxeria, o seu principal rival rexional. Os equipos españois ou británicos, que si foron benvidos, admiten que as posibilidades de atopar superviventes son case nulas.

O temor agora é que a descomposición dos cadáveres traia consigo enfermidades. Non van axudar as chuvias que se prevén para as vindeiras horas e que van converter en barro o adobe de que estaban feitas estas precarias vivendas.