Sexta derrota seguida dun Ensino que non conseguiu inquietar a Valencia
Enfrontábase ao equipo máis en forma da Liga Feminina, e perdeu por 85-50
Un cuarto. Foi o que lle durou a resistencia a un Durán Maquinaria Ensino que se enfrontaba ao Valencia Básket, o equipo máis en forma da Liga Feminina. Nos primeiros dez minutos, o resultado era de 17-14 e o Ensino chegou a poñerse por diante no segundo (17-18).
Pero un parcial demoledor nese segundo cuarto rematou coa resistencia do equipo galego, que marchou ao vestiario perdendo por un claro 37-22 despois de recibiren un parcial de 20-4.
O Valencia impuxo a súa poderosísima rotación (ata 11 xogadoras achegaron puntos) para ir aumentando a diferenza durante o segundo tempo. No Ensino a máis destacada foi Lydia Giomi con 12 puntos. En Valencia, dentro do bo nivel, tivo unha actuación notable a ourensá Raquel Carrera con 11 puntos, 3 rebotes 4 recuperacións.
