Soundhood Son Estrella Galicia enche de música os barrios da Coruña
Espazos cotiáns, como unha lavandaría, serven de escenario dos concertos
O Soundhood Son Estrella Galicia invadiu os barrios da Coruña cunha proposta que reimaxina a forma de gozar da música en directo fóra dos grandes recintos. Lugares cotiáns converténse en escenarios de singulares microfestivais que queren fomentar o local.
A banda El último ciclista, o novo proxecto de Gabrulo García, presentou o seu álbum debut nunha tenda de instrumentos musicais.
"Veño de Palermo, un barrio de Montevideo no que prolifera o candombe, unha música que nace no barrio, que se toca nas esquinas, na rúa. Trátase de reivindicar a proximidade", conta o músico uruguaio.
Co seu concerto arrancou unha nova edición do Soundhood, unha singular proposta de Son Estrella Galicia que abraza a música e a cultura desde a cotiandade dos barrios. A lista de bandas participantes é tan heteroxénea como os espazos nos que poderemos escoitalos en directo.
Diamante Negro tocará nunha lavandaría do Orzán e as madrileñas Las Petunias serán a parte sonora da experiencia gastromusical que preparan no restaurante Pracer de Montealto, onde, segundo conta o cociñeiro Moncho Bargo, fan "50 % música e 50 % gastronomía" e as receitas "están inspiradas na música que nos gusta".
Dúas bandas británicas, AK/DK e Kit Sebastian son a nota internacional do cartel do Soundhood Son Estrella Galicia, música, gastronomía e cultura para facer barrio.
