Trump, apoiado por Musk, volve ao lugar do seu atentado: "O inimigo interno é máis perigoso ca o externo"

O expresidente estadounidense e candidato presidencial Donald Trump asegurou este sábado, no seu regreso ao escenario do seu intento de asasinato en Pensilvania, que o "inimigo interno é máis perigoso" ca o externo e que quizais ordenaron a súa morte no atentado de xullo.

A un mes das eleccións do 5 de novembro, Trump regresou ao pobo de Butler (Pensilvania), onde Thomas Matthew Crooks, un mozo con problemas mentais, disparou contra o candidato, feríndoo na orella dereita e matando a Corey Comperatore, un dos asistentes.

Trump apelou ao medo a un "inimigo interior, que é máis perigoso ca o exterior" e dixo que a súa vitoria ten que ser masiva para que non poidan "roubarlle" as eleccións, alentando de novo as dúbidas sobre a lexitimidade dos comicios se non gaña.

"Nos últimos oito anos tentaron deternos para poder chegar ao noso gran futuro. Atacáronme, tentáronme eliminar cun "impeachment", imputáronme, tentado eliminarme das papeletas de voto e talvez, quizais, matarme", dixo.

Trump regresou ao mesmo escenario ao aire libre do seu atentado nesta localidade da Pensilvania rural xunto co seu compañeiro de fórmula, JD Vance, o magnate Elon Musk e o seu fillo Eric, que estivo acompañado da súa esposa, Lara Trump, copresidenta do Comité Nacional Republicano.

O exmandatario dixo que o tirador, abatido por francotiradores, "quixo acabar co movemento MAGA (Facer os Estados Unidos grandes de novo), o máis grandes que nunca viu este país", algo que levou a Trump a deixar na sombra o lonxevo Partido Republicano.

Musk pide o voto para Trump

Musk, que foi ovacionado no escenario, interveu brevemente para pedir o voto para Trump, lembrar que hai que rexistrarse para votar e insistir nas teorías, non fundamentadas nos feitos, de que os demócratas queren acabar co dereito ao voto.

"Queren arrebatarnos o noso dereito a votar. Se non gañamos non poderemos votar nunca máis", asegurou Musk.

Trump lembrou que Pensilvania é clave para a súa vitoria en novembro e que se gaña o estado chegará á Presidencia. Tamén dixo que, segundo algunhas enquisas, está a conseguir aumentar os apoios entre a colectividade latina.