Trump arrasa nas primarias republicanas de Iowa

O expresidente dos Estados Unidos Donald Trump arrasou este luns nos caucus de Iowa, a primeira cita das primarias republicanas para a Casa Branca. Trump alzouse coa vitoria nos caucus, obtendo un 51,1 % dos votos, case 30 puntos máis respecto ao segundo candidato, o gobernador de Florida Ron DeSantis (21,2 %), e seguido na terceira posición pola exembaixadora dos Estados Unidos ante a ONU Nikki Haley (19,1 %).

En cuarto lugar quedou, cun 7,6 % dos votos, o empresario tecnolóxico Vivek Ramaswamy, quen anunciou que se retiraba das primarias e daba o seu apoio a Trump: "Esta noite non é a fin dunha campaña senón o inicio dun novo camiño xunto a Donald Trump", dixo.

Tras coñecer a súa ampla vitoria Donald Trump saíu a celebralo cos seus seguidores nun acto no Centro de Eventos de Iowa de Deas Moines, a capital do estado. Alí ofreceu un discurso que empezou con palabras de unidade: "O noso país debe unirse. Queremos unirnos. Xa sexa republicano ou demócrata, liberal ou conservador, sería tan bo se puidésemos unirnos e solucionar o mundo, resolver os problemas e poñer fin a toda a morte e destrución que estamos a presenciar", manifestou.

Esa mensaxe conciliadora viuse substituído pola retórica antimigrante de Trump, quen afirmou que Os Estados Unidos sofren unha "invasión" coa chegada de migrantes á fronteira con México.

Os caucus de Iowa dan comezo ao ciclo electoral de 2024 nos Estados Unidos para decidir o candidato para as presidenciais de novembro. A seguinte cita será en Novo Hampshire o próximo día 23.