Último día da Feira do Moble da Estrada con medio cento de expositores

A feira do moble da Estrada pecha este domingo as súas portas despois de catro días de exposición e venda de mobiliario e decoración. Máis de medio cento de negocios amosaron os seus produtos para unha clientela que aproveita os descontos de entre o 20 e o 60%.

Ano a ano constátase que o domingo é o día grande da feira da Estrada. Desde as once da mañá o recinto feiral é punto de encontro do sector do moble e acolle compradores que nun mesmo espazo poden ver, probar, comparar e descubrir un mobiliario que chega incluso de países veciños. 

"Hai moita expectación. A xente pasa e gústalle e de dez ou quince que pasan se un compra unha peza xa é bo. Moita xente de Galicia pide este mobiliario rústico para as casas e os restaurantes porque lles gusta", explica Joaquim Pederneira, un expositor portugués que participa por primeira vez.

As previsións apuntan a que nesta edición se supere o milleiro de visitantes da última edición e que aumenten tamén o número de vendas pechadas e de proxectos futuros.

"Aquí basicamente o que estamos facendo é contactos e estamos contentos coa feira. Logo teñen que pasar por tenda, ver distintos acabados porque aquí só traes unhas mostras básicas", di Isabel Couto, que ten mobiliario a medida para calquera cuarto da casa.

"A xente vén con idea fixa e merca aquí. Despois xente que aínda está acabando as obras da casa vén pola tenda. Normalmente o negocio cérrase aquí na feira porque facemos descontos especiais, dun 20 a un 50 % nalgún produto", asegura César Barbosa, o único expositor da Estrada con presenza na feira.

A feira está aberta ata as oito desta tarde, con actividades infantís, sorteos de agasallos e descontos importantes durante o evento.