Un banco rectifica e di que Begoña Gómez si tiña diñeiro nas súas contas

O xuíz Juan Carlos Peinado recibiu dunha entidade bancaria unha lista con sete contas nas que figura Begoña Gómez, a esposa do presidente do Goberno, cun saldo total de 21.034,55 euros.

"Facilitamos os datos correctos referidos aos saldos a data 18/11/2024 das contas vixentes informadas a tal data (e non o dato de 0 euros que foi informado por erro en todas elas na resposta emitida a través do Punto Neutro Xudicial)", sinala o banco nunha misiva que consta no sumario da causa.

A entidade responde así ao titular do Xulgado de Instrución Número 41 de Madrid despois de que o pasado decembro o Punto Neutro Xudicial fixese chegar ao maxistrado unha lista "incompleta" con 11 contas bancarias -deste e outros bancos- nas que figuraba a esposa de Pedro Sánchez cun saldo total de 40,25 euros.

Naquela ocasión, facíase referencia a 11 contas: cinco en condición de "titular", dúas en calidade de "autorizado" e catro como "representante". As únicas nas que se reflectía algún saldo son dúas nas que figura como titular: unha con 40,10 euros e outra con 0,15 euros. O resto de contas estaban a cero euros.

Segundo precisaban con aquela listaxe, a análise das devanditas contas abarcaba un período que comeza o 1 de decembro de 2019 e culmina o 18 de novembro de 2024.

Apuntan a un erro técnico. No apartado de "tipo de petición", o Punto Neutro Xudicial contesta "produtos" e ao especificar de que tipo de produto se trata apunta: "CV".

O xuíz ordenou o pasado 19 de novembro á policía xudicial "consultar a numeración das contas correntes nas que figure como titular a investigada Begoña Gómez", a quen investiga por presunto tráfico de influencias, corrupción nos negocios, apropiación indebida e intrusismo.