Un exasesor de Junts na Eurocámara denuncia a Comín por acoso sexual e psicolóxico

Un exasesor de Junts no Parlamento Europeo presentou unha denuncia contra Antoni Comín, que na lexislatura pasada foi compañeiro de escano de Carles Puigdemont na Eurocámara, por acoso sexual e psicolóxico.

O denunciante, que traballou durante sete anos para Junts no Parlamento Europeo, interpuxo a denuncia ante o Comité Consultivo da Eurocámara, que investiga casos de acoso. Unha información á que reaccionou inmediatamente Junts per Catalunya.

Nun comunicado, Junts sinala que desde que tivo coñecemento da presentación da denuncia  se puxeron en marcha os mecanismos de investigación interna; unha vez finalizada esta, "tomaranse as medidas que correspondan".

A persoa denunciante relata tocamentos, insinuacións, interrogatorios sobre a vida sexual coa súa esposa, propostas de tríos con outro home e malos tratos de carácter laboral, rifas repentinas e ameazas de despedimento, ata que, tras as eleccións europeas do pasado ano, decidiu buscar outro emprego.

O exasesor expuxo a situación persoalmente ao expresidente catalán Carles Puigdemont, que lle expresou o seu apoio, aínda que nin el nin o seu partido abriron ningunha investigación interna respecto diso.

No seu comunicado, Junts asegura que se puxo "en contacto" coa persoa afectada e con Comín: "Unha vez presentada a denuncia no Parlamento Europeo, confiamos en que se aclaren os feitos, da mesma maneira que Junts iniciará a súa investigación", engade.

"Queremos deixar claro que o proceso interno ten que asegurar por unha banda a protección da persoa denunciante e pola outra a presunción de inocencia do eurodeputado Toni Comín. O órgano do partido está a decidir cales debe ser as medidas cautelares", apunta Junts.

Comín, no ollo do furacán

Nas últimas semanas, Comín viuse no ollo do furacán por diferentes acusacións, xusto cando aspira a converterse no novo presidente do Consello da República, espazo parainstitucional impulsado desde Bélxica por Puigdemont, nas eleccións internas que celebrará a entidade en febreiro.

A semana pasada, Comín denunciou un "erro" nunha auditoría publicada hai uns meses, que sementaba dúbidas sobre a súa xestión como vicepresidente executivo do Consello da República por uns gastos que no seu día se consideraron inxustificados.

Con todo, a xunta xestora do Consello da República denunciou "presións" ao auditor, que detectou gastos por valor de 15.530 euros realizados por Comín, que "non parecen estar xustificados".

As acusacións de Valtònyc

Nos últimos días, pola súa banda, o rapeiro mallorquino Josep Miquel Areas, Valtònyc, acusou a Comín de apropiarse de doazóns ao Consello da República.

Valtònyc, que foi responsable informático de xestionar esas doazóns, explicou en redes sociais que calou "durante moito tempo, por respecto" a persoas como Puigdemont ou o exconseller Lluís Puig, pero considera a Comín un "perigo potencial" se controla a presidencia do Consello da República. 

Comín nega as acusacións

O eurodeputado electo e membro de Junts Toni Comín negou este venres a través de redes sociais as acusacións.

Segundo Comín, o denunciante nunca traballou como asistente, senón que, tras "insistir" de maneira reiterada, permitíuselle participar nas reunións preparatorias semanais que levaba a cabo o seu equipo.

Asegura así mesmo que algúns dos "feitos" que denuncia se refiren de maneira completamente terxiversada a bromas e comentarios máis ou menos oportunos no marco dunha relación de confianza e de amizade construída durante o mandato.

Comín afirma que, en contra do que publica o mesmo diario, nunca "invadiu a intimidade do denunciante", que se incorporou ao equipo de campaña con vista ás eleccións á Eurocámara do pasado xuño "á petición propia e como voluntario".

Nega así mesmo "calquera episodio de violencia física" contra ningunha asesora do grupo de Junts no PE.

E asegura que os motivos polos que decidiu non contar co denunciante cando empezou a preparar o seu equipo de asistentes con vistas ao novo mandato foron "estritamente profesionais".

Ante a "gravidade das acusacións", afirma que emprenderá "as accións necesarias" para demostrar a súa "honorabilidade", a súa "inocencia" e a "corrección do seu comportamento en todo momento".

Nese contexto, engade que haberá que considerar "en que medida" a denuncia "pode ser considerada constitutiva dun delito de odio por homofobia", é dicir, un "atentado contra a súa integridade" por motivo da súa orientación sexual.