O PP rexistra no Senado unha proposta de lei do solo para facilitar a construción de vivendas

O PP rexistrou este venres no Senado unha proposta de lei do solo coa que pretende axilizar a construción de novas vivendas facilitando a urbanización con seguridade xurídica e menos "trabas administrativas".

A vicesecretaria de Vivenda do PP, Paloma Martín, rexistrou o texto na Cámara Alta e explicou que o seu partido busca ademais derrogar as zonas de mercado en tensión e o índice de prezos dos alugueiros, que considera os aspectos "máis lesivos" da lei de vivenda do Goberno de Pedro Sánchez.

"O que facemos é reducir os tempos de construción, porque imos reducir os tempos na tramitación e na emisión de informes sectoriais e de licenzas de construción", explicou.

Alberto Núñez Feijoo anunciou onte o seu plan de vivenda, co que pretende reducir o tempo de creación de novas vivendas de 10 a 4 anos cun plan de choque e unha nova figura, a do proxecto residencial estratéxico, malia que isto non forma parte da lei do solo rexistrada este venres.

Os populares buscarán o apoio doutros grupos para aprobar a lei, que tramitará no Senado, onde teñen maioría, pero que debe obter o visto e prace do Congreso dos Deputados para quedar aprobada.

"Nestes momentos non hai un só texto do Goberno rexistrado no Congreso dos Deputados, tampouco hai nin sequera unha iniciativa do Partido Socialista rexistrada no Congreso dos Deputados", sinalou Martín, lembrando que o PSOE retirou a firma da proposición que presentou xunto ao PNV.

Aval público de alugueiro

Por outra banda, foi crítica co aval público de alugueiro que o Goberno pactou con Junts dentro do novo decreto do escudo social, que o PP apoiará, que busca garantir o pago de todas as mensualidades impagadas ata que o propietario recupere a vivenda, os danos causados polo arrendatario e o custo de subministracións.

A proposta do PP é un seguro de falta de pagamento e a diferenza radica, segundo Martín, en que o aval se cobra cando se recupera o inmoble, pero o seguro cóbrase de maneira inmediata.

Segundo o PP, a medida do Goberno serve para aqueles que "teñen pulmón e poden aguantar o non cobrar a renda do inquilino", pero non para quen a necesita para vivir ou para pagar, por exemplo, a residencia dunha persoa maior.