Un home de 72 anos mata a coiteladas a súa parella no concello asturiano de Langreo

Un home, que xa foi detido, matou a coiteladas a súa parella esta noite no concello asturiano de Langreo, segundo informan fontes da investigación. A muller, a primeira vítima por violencia machista do ano no país, tiña 40 anos e tres fillos dunha relación anterior.

Karilenia, de orixe cubana, mantiña unha relación desde hai pouco tempo co agresor, de 72 anos. De acordo coas mesmas fontes, non interpuxera denuncias previas.

O crime tivo lugar ao redor das 23:00 horas en plena rúa na localidade de Sama de Langreo ante a presenza de dúas testemuñas que trataron de evitar o ataque. A muller faleceu pouco despois de recibir varias coiteladas, malia a intervención dos servizos sanitarios.

A continuación, a Policía Nacional detivo o presunto autor que foi trasladado aos calabozos de Langreo, onde permanece á espera de prestar declaración.

Comunicado conxunto

A Delegación do Goberno en Asturias, o Goberno do Principado e o Concello de Langreo emitiron un comunicado conxunto de condena e xa puxeron a disposición da contorna da vítima "os recursos psicolóxicos, xurídicos, sanitarios, de protección e de acollida que requira".

As tres Administracións tamén convocaron unha concentración ás 17:00 horas fronte á casa consistorial.

Atención ás vítimas

O 016 atende a todas as vítimas de violencia machista as 24 horas do día e en 53 idiomas diferentes, do mesmo xeito que o correo 016-online@igualdad.gob.es.

Tamén se presta atención mediante WhatsApp a través do número 600 000 016 e os menores poden dirixirse ao teléfono da Fundación ANAR 900 20 20 10.

Nunha situación de emerxencia, pódese chamar ao 112, á Policía Nacional (091) e a Garda Civil (062), pero tamén recorrer á aplicación ALERTCOPS, desde a que se envía un sinal de alerta á Policía con xeolocalización.