Un xulgado de Lugo confirma a venda de Pescados Rubén a Sart Galicia Pesca por 3,5 millóns

O Xulgado Número 2 de Lugo autorizou a venda das instalacións da empresa de Foz Pescados Rubén a Sart Galicia Pesca despois de que se desestimase o recurso de reposición imposto por un antigo provedor contra o proceso xudicial de concurso de acredores.

Con este auto, a empresa, con sede social en Burela e única que presentou unha oferta de compra formal, poderá terminar o proceso, que implica o pago de 3.450.000 euros pola firma e a subrogación de 29 traballadores.

Sart Galicia Pesca está vinculada á sociedade limitada Euroservipesca e ten como obxecto principal a importación, exportación, elaboración, procesado, comercialización, envasado e embalaxe de todo tipo de peixes, mariscos, moluscos crustáceos e outros produtos alimenticios, frescos, conxelados, afumados e elaborados.

Recoñece o auto que dita empresa creouse expresamente para a compra de Pescados Rubén a través da unión de tres socios de longa traxectoria profesional no sector.

A operación inclúe as tres naves que tiña a empresa, así como os vehículos e os activos que tiña a concursada na Coruña, Burela e o porto de Celeiro. Respecto á subrogación dos traballadores, a compradora presentou unha listaxe con nome, apelidos e cargo das 29 persoas que seguirán en nómina, conservando a antigüidade e demais condicións laborais do total de 80 que había en persoal.

Unha primeira sentenza, no mes de marzo, daba por resolta a oposición que mostraran varias entidades financeiras, acredoras de Pescados Rubén, que consideraban que o prezo de compra era inferior aos 9 millóns cos que se valorou antes do concurso de acredores a través dunha taxadora externa.

Os traballadores subrogados incorporaranse aos seus postos de traballo, mentres que o resto, chegou a un acordo coa entidade concursal para aceptar 23 días por ano traballado (ata un máximo dunha anualidade) no expediente de regulación de emprego extintivo (ERE).

A finais do ano pasado, Pescados Rubén, que chegou a alcanzar cifras de facturación de 43 millóns de euros, anunciou a retirada do histórico patrocinio do club de fútbol sala de Burela debido a problemas económicos. Ese foi o principio dun proceso de quebra que culminou coa presentación do concurso de acredores a principios do mes de febreiro.

A empresa, asentada no polígono de Fazouro, xustificou o peche alegando problemas de solvencia debido a unha débeda acumulada con provedores e atraso nas nóminas.

Pescados Rubén, comercializadora de peixe fresco, elaborado e conxelado, que mantiña negocios con 40 países, foi fundada en 1964 polo matrimonio formado por Rubén e Cesarina. Co paso dos anos foise estendendo ata ser un referente na comarca da Mariña. A empresa pasou a mans dos tres fillos, sendo dirixida por Concepción Blanco, que foi relevada fai uns dous anos polo seu irmán.