Varios detidos en Francia sospeitosos de preparar atentados ás portas das eleccións e dos Xogos
Varios detidos en Francia sospeitosos de preparar atentados ás portas das eleccións e dos Xogos
O ministro do Interior francés asegura que a ameaza terrorista é "extremadamente forte" a tres semanas do comezo dos Xogos Olímpicos de París
![Os servizos secretos xa detiveran un checheno que preparaba un atentado durante os Xogos Olímpicos no estadio de Saint Etienne](https://img-g24-crtvg.flumotion.com/prog24/2024/20240531/estadio-geoffroy-guichard.jpg)
Varias persoas foron detidas nos últimos días en dous puntos de Francia ante as sospeitas de que preparaban dous atentados terroristas diferentes, anunciou este venres o ministro do Interior Gérald Darmanin.
Nunha entrevista á canle BFMTV dedicada á campaña para a segunda volta das lexislativas, que se celebra o domingo e na que é candidato a un escano, Darmanin non precisou nin o número de arrestados nin os lugares onde foron capturados.
Insistiu en que o carácter terrorista dos proxectos que se supón que preparaban terá que ser confirmado pola Fiscalía Antiterrorista. Falando sempre en condicional, sinalou cando se lle preguntou se eran un ou dous os posibles atentados en preparación, que se trataría de proxectos diferentes.
En calquera caso, insistiu en que a ameaza terrorista en Francia é "extremadamente forte" a tres semanas do comezo dos Xogos Olímpicos de París.
Avanzou que a alerta terrorista, que se atopa no seu nivel máximo, vai continuar así polo menos ata despois dos Xogos Paralímpicos, que terminan o 8 de setembro.
Desde 2012, os atentados terroristas en Francia mataron 273 persoas e deixaron centos de feridos, segundo o reconto da Dirección Xeral da Seguridade Interior (DGSI, os servizos secretos).
Asemade, as forzas da orde desbarataron 81 atentados, 71 grazas á acción da DGSI.