Víctor Vicente deixa o Estradense despois de dezanove temporadas

Poucos futbolistas quedan como o interior do Estradense Víctor Vicente (28-9-85). No ano 2004 debutou no primeiro equipo do cadro estradense e, desde entón, permaneceu todas as temporadas vestindo a mesma camisola. Celebrando éxitos e rumiando derrotas pero sempre fiel ao equipo da súa vila. 

Chegou ao equipo cando estaba en Primeira Autonómica, xogou boa parte da súa traxectoria na Preferente e acadou dous ascensos co Estradense a Terceira División (2010, 2019). Nas últimas temporadas, os seus minutos baixaron pero o peso no equipo mantívose e formou parte do mellor Estradense da historia, o que rozou o ascenso a 2.ª RFEF en 2021.