Zelenski: "Ucraína recuperará o que lle pertence, incluída Crimea"

O presidente ucraíno, Volodímir Zelenski, dixo que a bandeira do seu país xa ondea en moitos lugares do Donbás, onde Rusia celebrou referendos de anexión que cualificou de "farsa".

"Rusia escenificou unha farsa no Donbás. Unha farsa absoluta que quería presentar como referendos", dixo Zelenski na súa habitual alocución nocturna.

"Montaron un número, percorreron as casas con metralladoras, repartiron pedazos de papel e os propagandistas facían películas coas zonas ocupadas. E agora a bandeira ucraína ondea alí", agregou.

Segundo o mandatario, durante esta semana aumentaron as bandeiras ucraínas no Donbás e "a semana próxima haberá aínda máis".

O presidente de Ucraína referiuse concretamente á cidade de Limán, na rexión de Donetsk, onde xa entraron tropas ucraínas.

"A bandeira ucraína xa ondea en Limán, na rexión de Donetsk e vaise quedar alí. Non hai pegadas dos referendos nese lugar", asegurou.

Zelenski dixo que Ucraína volverá recuperar todo o seu territorio, incluíndo a península de Crimea, anexionada por Rusia en 2014.

"Ucraína recuperará o que lle pertence, no leste e no sur, o que trata de ser recuperado agora e tamén Crimea, que foi anexionada en 2014. A nosa bandeira tamén estará alí", afirmou.