Zelenski cre que as garantías europeas non serán suficientes e a UE pide avivar o apoio a Kíiv

O presidente de Ucraína, Volodímir Zelenski, afirmou este xoves que as garantías de seguridade que poidan ofrecer os países europeos a Ucraína fronte a Rusia “non serán suficientes”, e deixou claro que deberá ser a OTAN a que as proporcione.

Zelenski expresouse así tras participar no cume de líderes da Unión Europea celebrada en Bruxelas, na que os Vinte e sete instaron a intensificar o apoio militar a Kíiv, á vez que apostaron por unha paz "xusta" para Ucraína.

“Creo que as garantías europeas non serán suficientes para Ucraína”, indicou Zelenski nunha conferencia de prensa, na que agregou que “a verdadeira garantía en calquera caso, agora ou no futuro, será a OTAN”, a cal se basea en decisións que toman os países europeos e os Estados Unidos principalmente, dixo.

Sobre a posibilidade de despregar tropas de paz estranxeiras en Ucraína, Zelenski manifestou que apoia a "iniciativa" do presidente francés, Emmanuel Macron, pero asegurou que necesita ter "todos os detalles sobre este continxente militar".

"Dicimos que podería ser parte das garantías de seguridade. Non fai falta dicir que a OTAN é a mellor garantía de seguridade para Ucraína, e, por suposto, ata que Ucraína sexa membro da OTAN este aspecto podería ser considerado como unha alternativa", comentou.

Incidiu en que habería que saber cantos soldados formarían parte dese continxente ou que farían ante un ataque ruso. "Moitas cuestións están a exporse. Estamos a debatelas", expuxo. No seu perfil da rede social X, Zelenski recalcou que apoia a iniciativa francesa dun continxente militar en Ucraína e pediu a "outros socios" que se unan á proposta, xa que na súa opinión "axudará a que a guerra termine".

Polo que respecta á diplomacia, dixo na conferencia de prensa que, “por suposto, os Estados Unidos e Europa deben sentar á mesa cando chegue o momento”. “Do mesmo xeito que Ucraína, a UE debe iniciar as conversacións desde unha posición forte, e a forza de Europa é a unidade”, comunicou no discurso que pronunciara momentos antes ante os xefes de Estado e de Goberno da UE. Segundo afirmou, “necesitamos esforzos coordinados para lograr unha paz duradeira, non só unha pausa nos combates, que Putin quere para gañar tempo”.

Zelenski insistiu na conferencia de prensa na urxencia de que os aliados proporcionen a Ucraína os 19 sistemas de defensa aérea adicionais que lles solicitaba previamente. Nas conclusións sobre Ucraína aprobadas polos líderes dos Vinte e sete, fíxose un chamamento para que “se intensifiquen urxentemente os esforzos”, en particular no que se refire á entrega de sistemas de defensa aérea, municións e mísiles, así como á subministración da formación e o equipamento necesarios para as brigadas ucraínas.

Así mesmo, os líderes reafirmaron o seu “compromiso inquebrantable” de proporcionar un apoio político, financeiro, económico, humanitario, militar e diplomático continuado a Ucraína e ao seu pobo “durante todo o tempo que sexa necesario e coa intensidade que faga falta”. “Rusia non debe prevalecer”, recalcaron os líderes da UE.

Os Vinte e sete manifestaron o seu apoio a unha paz "integral, xusta e duradeira baseada nos principios da Carta de Nacións Unidas e o Dereito Internacional, en liña cos principios e obxectivos clave da Fórmula de Paz de Ucraína". Co décimo quinto paquete de sancións contra Moscova recentemente adoptado, o Consello Europeo asegurou que está disposto a intensificar a presión contra Moscova con novas medidas restritivas.

Nunha conferencia de prensa posterior á reunión, o presidente do Consello Europeo, António Costa, dixo que só Ucraína, "como o país agredido, pode lexitimamente definir que significa paz e cando se cumpren as condicións para negociacións cribles".

"Así que agora non é o momento de especular sobre diferentes escenarios. Agora é o momento de fortalecer a Ucraína para todos os escenarios", subliñou, en referencia a se continúa a guerra, chega a paz, se é o momento da reconstrución ou de negociar, segundo manifestou.

O primeiro ministro de Hungría, Viktor Orbán, cuxo país presidiu o Consello da UE este semestre, asegurou que todo o que fixo nestes seis meses sobre a guerra en Ucraína foi a nivel bilateral e non en nome do club comunitario.

"Non tiven marxe de manobra porque dentro da Unión Europea non tes consenso, e se non tes consenso, entón non podes facer nada en nome do Consello Europeo (os líderes da UE)", comentou. "Todo o que fixen en relación coa guerra, tíveno que facer á parte e non dentro da Unión Europea. Tiven que utilizar unha diplomacia bilateral", completou.