Zuckerberg reorienta Meta e abraza a narrativa sobre liberdade de expresión de Trump e Musk

A multinacional Meta, que sostén plataformas como Facebook, Instagram ou WhatsApp, anunciou que pon fin ao seu programa de verificación de datos. Substituirao por un sistema de apuntamentos dos usuarios similar ao da rede X.

Anunciouno este martes nun comunicado o delegado de Meta, Mark Zuckerberg, quen asegura que os cambios, de momento, só terán efecto nos Estados Unidos.

O novo modelo, coñecido en inglés como ‘Community Notes’ (notas da comunidade) permitirá aos usuarios de Facebook ou Instagram sinalar as publicacións potencialmente enganosas e que necesiten máis contexto, un labor que ata o de agora facían expertos e organizacións independentes de comprobación de datos.

“Imos desfacernos dos verificadores de datos e a substituílos por notas comunitarias similares a X, empezando polos Estados Unidos”, sinala Zuckerberg, quen afirma que os sistemas creados por Meta para moderar as súas plataformas estaban “a cometer demasiados erros”.

Con todo, asegura que a empresa seguirá moderando o contido relacionado con drogas, terrorismo e explotación infantil.

O achegamento entre Zuckerberg e Trump

A decisión de Mark Zuckerberg de acabar co programa de verificación en Meta e as súas críticas a medios tradicionais por "meter presión para censurar máis e máis" debuxa unha nova visión entre as grandes redes sociais que podería ter importantes consecuencias poucos días antes da chegada de Donald Trump á Casa Branca.

Tras as eleccións de novembro, Zuckerberg buscou un achegamento con Trump, quen acusara a Meta de parcialidade e chegara a ameazar o seu director executivo con "prisión para sempre" despois de que suspendera a súa conta de Facebook tras o asalto ao Capitolio en 2021.

O novo rumbo de Meta foi aplaudido tanto por Musk, a persoa máis rica do mundo e un dos principais asesores do Goberno de EUA, como por Trump, quen suxeriu que as súas ameazas puideron propulsar este cambio de rumbo en Meta.

Pola contra, a directora da Rede Internacional de Verificación (IFCN polas súas siglas en inglés), Angie Holan, manifestou nunha publicación en X que a decisión "fará dano aos usuarios de redes sociais que buscan información confiable" e chega "por mor da presión política extrema dunha nova administración e os seus seguidores".