Irán libera a xornalista italiana Cecilia Sala

A xornalista italiana Cecilia Sala, encarcerada desde o pasado 19 de decembro en Irán por "violar as leis da República Islámica", foi liberada e xa viaxa cara a Italia, segundo informou este mércores o Goberno italiano

"O avión que levaba á casa a xornalista Cecilia Sala engalou de Teherán hai uns minutos. Grazas a un intenso traballo nas canles diplomáticas e de Intelixencia, a nosa compatriota foi liberada polas autoridades iranianas e está de regreso a Italia", indícase nun comunicado.

A liberación da xornalista, que se espera que aterre á 15:30 hora local no aeroporto romano de Ciampino nun avión fretado especialmente polo Goberno italiano, foi unha sorpresa, a pesar das intensas negociacións que levaban a cabo as autoridades italianas co réxime iraniano.

A primeira ministra, Giorgia Meloni, que informou persoalmente os pais da xornalista durante unha chamada telefónica, quixo "expresar a súa gratitude a todos os que contribuíron a facer posible o regreso de Cecilia, permitíndolle reencontrarse coa súa familia e os seus colegas".

O Goberno italiano pediu a pasada semana ás autoridades iranianas a "liberación inmediata" de Sala, que permanecía encarcerada nunhas condicións "extremadamente difíciles" na prisión de Evin.

"Creo que o Goberno do noso país fixo un traballo excepcional. Se me escoitan coa voz crebada, é porque non vía o horizonte. Foi un traballo de coordinación extraordinario. Confiaba na forza de Cecilia", declarou o pai da xornalista, Renato Sala.

"Diplomacia e traballo en equipo: Cecilia Sala está a regresar a casa!", chiou Antonio Tajani, ministro de Exteriores e vicepresidente do Goberno, mentres que o outro vicepresidente, Matteo Salvini, escribiu: "Cecilia Sala, liberada, está en camiño a Italia. Benvida de volta!".

A xornalista, acusada polo réxime iraniano de “violar as leis da República Islámica”, puido telefonar a súa familia, tras días de silencio, para contarlles que durmía no chan da cela, permanentemente iluminada, só con dúas mantas e que se atopaba en réxime de illamento total.

Sala, experta en información internacional de 29 anos e colaboradora do diario Il Foglio, foi arrestada o pasado 19 de decembro no seu hotel en Teherán, pouco antes de dirixirse ao aeroporto para regresar ao seu país.

Atopábase na república islámica cun visado xornalístico e publicara algunhas reportaxes sobre a situación no país e o modo en que lle afectaba a caída do réxime na veciña Siria.

A xornalista realizara desde o país algunhas reportaxes sobre as condicións das mulleres, como a súa intervención o 17 de decembro nun podcast sobre o "patriarcado en Teherán".