'El Confidencial' publica que a muller de Pedro Sánchez mantivo reunións cun dos líderes da trama

Un dos líderes da trama, Víctor de Aldama, traballaba tamén como asesor de Air Europa, a compañía que tivo que ser rescatada o ano da pandemia con 615 millóns de euros das arcas públicas.

O daquela ministro de Transportes recoñeceu que o comisionista se interesou pola operación, pero que non tivo influencia. "Simplemente interesarse, loxicamente, porque traballaba para Air Europa, pero iso non significa nada na resolución do tema", dixo José Luis Ábalos nunha entrevista en Onda Cero.

Este xoves, El Confidencial publica que Begoña Gómez, muller de Pedro Sánchez, tamén mantivo reunións con Víctor de Aldama e o conselleiro delegado do grupo Globalia, en que está Air Europa, Javier Hidalgo, na mesma época do rescate da aeroliña e da venda de máscaras agora baixo investigación.

O voceiro do PP no Congreso, Miguel Tellado pídelle explicacións ao presidente do Goberno "porque hoxe coñecemos que a súa muller, directamente, e nas mesmas datas, tivo relación con membros da trama".

Tamén o presidente do partido, Alberto Núñez Feijóo, lle pregunta a Pedro "que responsabilidade persoal ten na trama que estamos coñecendo".

Dende o PSOE lembran que na altura Begoña Gómez traballaba para o Instituto de Empresa e que reunirse con empresarios formaba parte do traballo. Para María Jesús Montero, vicepresidenta primeira do Goberno, "en política non todo vale" e pide deixar as familias fóra da tirapuxa política. "Non se poden tolerar as calumnias, as infamias, e menos dirixidas ao entorno do presidente", díxolle aos xornalistas nos corredores do Congreso.

O presidente do Goberno non se referiu a este asunto e segue coa súa axenda. Este xoves recibiu na Moncloa a vitoriosa selección feminina de fútbol.