Cincuenta mortos tras o ataque israelí a un campo de refuxiados de Rafah

O ataque israelí contra un campo de refuxiados de Rafah deixa polo menos 50 mortos e decenas de feridos. O exército hebreo asegurou que ía dirixido contra dous líderes de Hamas e que abriu unha investigación porque persoas alleas a ese obxectivo quedaron feridas.

As imaxes que chegan de Rafah dan mostra da magnitude do masacre no barrio de Tal al Sultan, ao noroeste da cidade. As bombas lanzadas pola aviación israelí incendiaron as tendas de campaña e moitas das vítimas faleceron queimadas. E moitas desas vítimas son nenos. 

"Estabamos diante da casa seguros. De repente oímos o son dun mísil. Botamos a correr e vimos a rúa cuberta de fume", relata un supervivente. Ese barrio aínda non fora evacuado, non o ordenaran, e acollía centos de desprazados que fuxiran das zonas orientais da cidade. En principio, era unha zona designada como de protección humanitaria. 

"Outro atroz masacre cometido polas forzas israelís en Rafah"

O exército hebreo acabou recoñecendo o ataque. Supostamente, ía dirixido contra dous altos cargos de Hamas, que, segundo intelixencia precisa, se escondían alí. Aseguran os altos mandos israelís que se usaron armas de precisión contra brancos lexítimos. 

O Ministerio de Sanidade de Gaza, controlado por Hamas, sinala: "Estamos ante outro atroz masacre cometido polas forzas israelís en Rafah, que custou ata o momento a vida de 50 mártires e decenas de feridos, a maioría deles nenos e mulleres".

"Nunca antes na historia se empregaron tantas ferramentas de matanza en masa fronte ao mundo como está a suceder agora en Gaza, onde a poboación se ve privada de auga, alimentos, medicinas, electricidade e combustible, esmagando a infraestrutura e destruíndo todas as institucións", denunciou o Ministerio de Sanidade de Gaza.

Segundo os seus datos, nas últimas 24 horas 190 palestinos morreron en novos masacres perpetrados por Israel en toda a rexión. Desde que comezou a guerra, hai máis de sete meses, a cifra de gazatís mortos supera os 36.000.

O exército israelí continúa o seu avance cara ao extremo sur de Gaza para expulsar a Hamas. Sospeita que algúns dos reféns secuestrados polos terroristas o 7 de outubro están alí. 

Organizacións humanitarias denuncian ante a UE as "liñas vermellas" cruzadas en Gaza

Representantes de organizacións humanitarias colocaron este luns unha cinta vermella fronte ás institucións comunitarias en Bruxelas, onde se celebra hoxe o Consello de ministros de Exteriores da Unión Europea, para representar as "liñas vermellas" cruzadas por Israel na súa ofensiva en Gaza e pedir sancións por parte dos líderes europeos.

Oxfam, Save the Children, Comité Internacional de Rescate, World Vision, Plan Internacional ou Cooperación Internacional para o Desenvolvemento e a Solidariedade (CIDSE)  denuncian que, no que levamos de ofensiva, 254 traballadores humanitarios e 493 sanitarios morreron en Gaza e cada minuto 10 nenos morren ou quedan feridos por ataques perpetrados por Israel na zona.

A asesora de programas para Oriente Medio e Norte de África de Oxfam en Bélxica, Agnès Bertrand-Sanz, sinala: "Só fai falta mirar as cifras, isto vai ser unha mancha para a humanidade se non facemos nada".

Albares pide a Israel que deteña a súa ofensiva en Rafah

O ministro de Exteriores español José Manuel Albares pedirá este luns aos seus homólogos da Unión Europea (UE) que adopten "as medidas adecuadas" para obrigar a Israel a cumprir coa decisión da Corte Internacional de Xustiza (CIX) de deter a ofensiva en Rafah.

"Pedirei aos outros vinte e seis socios que declaren o apoio á decisión da Corte Internacional de Xustiza e tamén que se Israel continua adiante contra esta opinión tentemos tomar as medidas adecuadas para aplicar a decisión", dixo Albares nunha comparecencia ante os ministros de Irlanda e Noruega.

O ministro de Exteriores irlandés Michael Martin e o noruegués Espen Barth Eide condenaron tamén o ataque. "O que vimos esta madrugada é salvaxe", dixo Martin, "todo isto era predicible".
Na mesma liña, o xefe da diplomacia norueguesa dixo: "A guerra continua en Rafah é un incumprimento (da decisión) do Tribunal máis importante do mundo".

Os tres ministros reuníronse antes do encontro que celebrarán hoxe en Bruxelas os ministros de Exteriores da Unión Europea e a véspera do recoñecemento do Estado de Palestina.

Netanyahu di que é un "tráxico contratempo"

Sobre os sucesos acaecidos en Rafah este luns, o primeiro ministro israelí, Benjamín Netanyahu, afirmou que a morte de civís é un "tráxico contratempo".

"Estamos a investigar o caso, esa é a nosa política. Para nós, cada dano a civís non involucrados é unha traxedia", indicou Netanyahu nunha audiencia no Parlamento israelía con familias de reféns sobre a guerra na Franxa.

O Exército indicou que se tratou dunha "operación precisa baseada en intelixencia" dirixida a eliminar a dous altos mandos de Hamás que se atopaban nun edificio na zona; aínda que admiten que logo se xerou un incendio que provocou un alto número de vítimas mortais.

O Fiscal Xeral Militar, o maior xeral Yifat Tomer Yerushalmi, ordenou abrir pescudas sobre este bombardeo ao Mecanismo de Investigación e Avaliación do Estado Maior, unha entidade semindependiente formada por exmilitares que xa investigou hai un mes o ataque de Israel a un convoi humanitario da ONG World Central Kitchen, no que morreron sete dos seus empregados, seis deles estranxeiros.

Netanyahu participou nunha sesión extraordinaria na Knéset a pedimento de 40 deputados, que obriga ao primeiro ministro a asistir a sede parlamentaria, onde tamén acudiron hoxe familiares dos reféns, que reclaman un acordo inmediato para liberar a todos os reféns e teme que casos como o ataque en Rafah dificulten as negociacións. "Desde decembro e ata o de agora, recibín cinco solicitudes do equipo negociador para ampliar o seu mandato e aprobei todas e cada unha delas", explicou Netanyahu ás familias.

A oficina do primeiro ministro anunciou a semana pasada que autorizou ao equipo negociador a retomar as negociacións no Cairo e espérase que así suceda mañá, aínda que o liderado de Hamás insiste en que non hai acordo posible mentres Israel non acceda ao fin da guerra.