Galicia busca man de obra no exterior para cubrir as necesidades do tecido produtivo

Paola Rodríguez chegou a Galicia hai cinco anos buscando un futuro laboral. Atopouno nos servizos de coidados, un dos sectores que demanda máis profesionais.

 "Estou moi contenta aquí. E moi agradecida porque a empresa abriume as portas".

O sector dos coidados, coma a hostalería ou a construción, presenta dificultades engadidas para atopar man de obra.

"Non se dan cuberto todos os postos de traballo que se están a demandar por parte das empresas. A curto e a medio prazo a única saída é buscar traballadores noutros ámbitos xeográficos", asegura o director xeral da Cámara de Comercio da Coruña, Manuel Galdo.

Unhas dificultades ás que se suman os permisos de traballo e residencia, que obrigan a moitas empresas a ter que prescindir de posibles candidatos.

"En moitas ocasións tivemos que despedir traballadoras con xornadas completas e bos salarios porque quedan sen permiso de traballo", di Sonia Rodríguez Iglesias, xerente dunha empresa de axuda a domicilio. 

Galicia busca incorporar traballadores a través dun proceso tutelado con outros países que facilitaría a homologación de títulos e os permisos de traballo.

"Para que poidan vir xa dunha maneira regrada en base a esas demandas empresariais que existen, cuns contratos formalizados.", explica Manuel Galdo, director xeral da Cámara de Comercio da Coruña.

A Xunta de Galicia valora reclamarlle ao Goberno central as competencias en materia de permisos de traballo, que xa teñen comunidades coma Euskadi, para poder dar resposta ao tecido empresarial.