O sector turístico galego afronta a Semana Santa cunha media de reservas do 60 %

A Semana Santa é o punto de partida da temporada alta para o turismo. En Galicia, dependendo da zona e do tipo de establecemento hoteleiro, as previsións do sector turístico respecto á ocupación varían. 

"Cara á primeira parte da semana a ocupación rolda o 56 % de ocupación, cada a fin de semana e os festivos sobe sobre uns dez puntos, xa estamos preto do 67 %", di Carmen García Ochoa, subdirectora do hotel Oca Porta do Camiño.

"Hoxe por hoxe estamos máis ou menos sobre o 75 % de ocupación, pero isto é variable, subirá", destaca Ana Boo, recepcionista do hotel Alda Avenida, en Santiago.

Esta é unha época na que en función da meteoroloxía hai moita reserva de última hora. A estancia media deste período vacacional sitúase nas tres noites.

"Por primeira vez temos un programa no Clúster de Turismo de Galicia que se chama SIMADA (Sistema de Monitorización e Análise de Datos de Aloxamento), hai uns 200 establecementos adheridos actualmente, xa nos comezan a dar datos moi reais. Hai tres días estaban entre un 45 % e un 60 % de reservas reais e efectivas. Hai que poñer en valor que a Semana Santa en Galicia é unha Semana Semana de festa: a Semana Santa de Ferrol, de Viveiro, de Fisterra, o encaixe de Camariñas... en función de como estea o tempo a xente decide a última hora a onde vai, pensamos que a Semana Santa vai ser boa", asevera Jesús Picallo, vicepresidente do Clúster de Turismo de Galicia.

Os prezos medios, dependendo do establecemento turístico, van desde os 45 euros a noite aos 170 euros. Hai un 60 por cento de visitantes nacionais e portugueses, moitas familias...

"Tamén temos estranxeiros que veñen por turismo relixioso", engade Carmen García Ochoa, subdirectora do hotel Oca Porta do Camiño.

Gastronomía, natureza, artesanía, patrimonio artístico e cultural atraen cada ano por estas datas numerosos visitantes ata Galicia.