A alta demanda e a escaseza do produto fan subir o prezo do marisco

Como todos os anos por esta ponte festiva da Asunción da Virxe María, os prezos do marisco disparáronse. "Os prezos están desorbitados, case como no Nadal".

Os percebes, as nécoras e tamén as navallas son dos que máis subiron. "Os percebes están a 125 euros, as nécoras grandes a 90 euros". "As ameixas e as navallas tamén subiron moito". "Os camaróns, a 90 euros, e non son moi grandes. Pero é que non hai".

Os clientes cren saber o motivo desta escalada de prezos. "Porque hai moitas festa e celebracións e todos queren levar marisco. Tamén inflúe a chegada dos turistas".

Porén os vendedores dan a súa explicación. "Non hai moita cantidade. Xa na lonxa non hai moito peixe nin moito marisco... e por iso, sobe".

Aínda así, case todos os que se achegan ao mercado coruñés da praza de Lugo, acaban mercando. "Hai que mercar porque temos aquí os familiares... e para que proben o que temos aquí". "Nótase que é agosto, pero algo hai que picar... En vez de levar dous quilos, pois levamos un".