A Asemblea Nacional de Ecuador ábrelle xuízo político ao presidente Lasso

A Asemblea Nacional de Ecuador aprobou este martes levar a un xuízo político de censura o presidente do país, o conservador Guillermo Lasso, acusado pola oposición de presunto delito de malversación en empresas públicas.

Co voto de 88 lexisladores, de 116 presentes, 23 en contra e 5 abstencións, aprobouse a moción presentada pola lexisladora Viviana Veloz, do movemento Unión pola Esperanza (UNES), que lidera o expresidente progresista Rafael Correa (2007-17).

Con esa votación, o pleno da Asemblea resolveu "axuizar politicamente o presidente da República" pola "infracción constitucional de peculato", admitida a trámite pola Corte Constitucional.

A resolución alcanzouse co concurso de varios grupos políticos, sobre todo do opositor UNES, o Partido Social Cristián (PSC) e o movemento indíxena Pachakutik, e tamén de independentes.

Segundo a acusación descrita na resolución lexislativa, "evidénciase o desvío ou distracción dos fondos" xerados pola empresa estatal Flota Petrolera Ecuatoriana (FLOPEC) con compañías privadas, como Amazonas Tanker, coas que tiña relación contractual para o transporte de cru.

Perda para o Estado

De acordo con Veloz, o presidente Lasso, xunto a un delegado seu, Hernán Luque, "definiron a continuación dos contratos de transporte de petróleo en favor de terceiros, conscientes de que os mesmos representaban unha perda para o Estado".

Así mesmo, asegura que Lasso "coñecía e sabía da estrutura de corrupción en FLOPEC" e que incumpriu o seu deber constitucional de impedir a suposta trama de corrupción.

O artigo 2 da resolución parlamentaria dispón que o presidente da Asemblea Nacional Virgilio Saquicela "continúe de maneira inmediata coa tramitación do proceso de xuízo político" contra Lasso, para o que debe convocar nun prazo de cinco días a unha sesión do pleno para interpelar o mandatario.

Tamén dispón que se notifique ao presidente Lasso "coa presente resolución" e que se lle entregue "o expediente íntegro deste proceso".

A resolución da maioría lexislativa deuse tras un polémico proceso de revisión da proposta de xuízo político, que empezou coa admisión a trámite polo presunto delito de malversación, cualificado pola Corte Constitucional, que, con todo, rexeitou no trámite outras causas como concusión, suborno e enriquecemento ilícito.