A Audiencia Nacional investiga se o apagamento en España foi unha sabotaxe informática
O xuíz da Audiencia Nacional José Luis Calama di que aínda que a "causa resulta descoñecida, o ciberterrorismo atópase entre unha das posibles opcións"
O xuíz dálles dez días ao Centro Criptolóxico Nacional, a Rede Eléctrica e á Xefatura de Información da Policía para que presenten cadanseu informe sobre o acontecido
Arquivo
A Audiencia Nacional abre dilixencias para investigar se o apagamento en España foi unha sabotaxe informática.
O xuíz José Luis Calama incoou dilixencias previas para investigar se o apagamento na rede eléctrica española deste luns que afectou a todo o territorio nacional puido ser un acto de sabotaxe informática en infraestruturas críticas españolas.
Nun auto, o maxistrado indica que, aínda que neste momento a causa dos feitos resulta descoñecida, "o ciberterrorismo atópase entre unhas das posibles" opcións. Polo tanto, resulta necesaria, segundo o maxistrado, a apertura dunha investigación xudicial.
O xuíz dá dez días de prazo para elaborar os primeiros informes
Neste contexto, acorda como primeiras dilixencias requirir ao Centro Criptolóxico Nacional e a Rede Eléctrica a elaboración de dous informes para que nun prazo improrrogable de 10 días indiquen as causas que motivaron o apagamento.
Do mesmo xeito, o xuíz Calama solicita á Xefatura de Información de Policía que, tamén nun prazo de dez días, presente informe preliminar sobre os feitos acontecidos este luns en toda España.
O maxistrado explica que o incidente ocorreu este luns sobre as 12:30 horas e afectou sistemas informáticos que soportan infraestruturas que proporcionan os servizos esenciais á sociedade como saúde, enerxía, industria ou transporte, o que supuxo "unha situación crítica para o benestar e sentimento de seguridade de todos os cidadáns".
O auto recolle a explicación facilitada polo Goberno de que "se perderon" de forma súbita durante 5 segundos 15 xigawatts da enerxía que se estaba producindo nese momento, o que equivale ao 60 % da luz que se estaba consumindo, sendo "algo que non ocorrera xamais".
Posible delito de terrorismo
O titular do Xulgado Central de Instrución Número 4 explica que conforme ao artigo 573 do Código penal os delitos informáticos poden ser cualificados como terrorismo cando a súa finalidade sexa desestabilizar gravemente a orde constitucional ou o funcionamento dos servizos esenciais.
O instrutor, na súa resolución, examina a lexislación nacional e europea en materia de protección de infraestruturas críticas e loita contra o ciberterrorismo e sinala que, no caso de España, levou o lexislador a introducir no Código penal este fenómeno dentro dos delitos de terrorismo.
En concreto, no artigo 573. 2, no que inicialmente encaixarían os feitos "en caso de que a súa orixe estivese auspiciada na forma e con algunha das finalidades descritas no devandito tipo penal".
